БОЛА ҲУҚУҚЛАРИНИНГ ҚОНУНИЙ КАФОЛАТЛАРИ БЎЙИЧА ХАЛҚАРО ТАДБИР
Судьялар олий кенгаши ҳузуридаги Судьялар олий мактабида икки кунлик “Фуқаролик суд ишларини юритишда болалар ҳуқуқларини ҳимоя қилишга оид халқаро ва миллий стандартларни ўргатиш” мавзусида семинар бўлиб ўтди.
Унда Судьялар олий мактаби ўқитувчилари ва тингловчилари, USAID ва UNICEF халқаро ташкилот вакиллари, Олий Мажлиснинг Болалар ҳуқуқлари бўйича вакили (омбудсман), Олий суд, Тошкент шаҳар суди ҳамда Мирзо Улуғбек, Учтепа, Шайхонтоҳур туманлараро суди судьялари, шунингдек, Президент ҳузуридаги Ижтимоий ҳимоя миллий агентлиги вакиллари иштирок этишди.
Тадбирда АҚШлик эксперт Том Роулингс ўз тажрибалари билан ўртоқлашди.
Тренинг давомида болаларга васийликни белгилаш, болалар ва ўсмирлар психологияси ва боланинг ривожланиш босқичларини тушуниш ва турли ёшдаги болалар билан дўстона мулоқотда бўлиш, фарзандликка олиш, оталикка эътироз, оталикни белгилаш билан боғлиқ ишларни кўриб чиқиш каби масалалар бизда ҳамда хорижда қандай ҳал этилиши, шунингдек, фуқаролик судлари томонидан оилавий ишларни кўриб чиқиш масалалари юзасидан судьялар ҳамда хорижлик экспертлар билан ўзаро фикр алмашилди.
Тадбир якуни бўйича тренингда фаол иштирок этган иштирокчиларга сертификатлар топширилди.
Г. Джумаева,
фуқаролик ишлари бўйича
Шайхонтоҳур туманлараро судининг судьяси