ФАРЗАНДЛАРНИ КЎРИШ УЧУН СУДГА АРИЗА БЕРИЛСА, НЕЧИ БОР КЎРИШИШ УЧУН РУХСАТ БЕРИЛИШИ МУМКИН?
— Яқинда амакимнинг ўғли оиласи билан келишолмай қолди. Келин ажрашиш учун фуқаролик судига даъво ариза берган. Келин болалари билан ота-онасининг уйига кетиб қолган. Укамга фарзандларини кўрсатмаяпти. Фарзандларини кўриши учун судга ариза берса, фарзандларини ҳафтасига ёки ойига нечи бор кўриши учун рухсат бериши мумкин?
Исми сир тутилди
Амина Худайбергенова, фуқаролик ишлари бўйича М.Улуғбек туманлараро суди судьяси:
— Фуқаролик процессуал кодексининг 189-моддаси талабига мувофиқ, даъво аризасида даъвогарнинг талаби аниқ кўрсатилган бўлиши лозим. Яъни укангиз, фарзандлари билан ҳафтада бир марта, ёки ҳар ойда бир маротаба кўришиш тартибини белгилаш тўғрисида даъво талабида аниқ кўрсатиши лозим.
Даъвогарнинг даъво талаблари суд муҳокамасида ўрганилиб, боланинг ёшини, кун тартиби, соғлиғи, ўсиш ва тарбияланиш учун шароитлар яратилганлиги ҳамда боланинг ҳуқуқ ва манфаатларига зиён келтирмайдиган барча ҳолатларни инобатга олган ҳолда ота(она) билан учрашиш тартибини белгилайди. Кўришиш тартиби суд томонидан вазият ўзгаргаргунга қадар деб белгиланиши ва вазият ўзгариши билан (масалан боланинг ёши, соғлиғинининг тикланиши) даъвогар томонидан судга янгидан даъво ариза бериш орқали, кўришиш тартибини янгидан белгилашни сўраши мумкин.
Шу билан бирга таъкидлаш лозимки, ушбу низоли вазият суд томонидан тартибга солинсада, боланинг ҳуқуқ ва манфаатидан келиб чиқиб, унинг тарбияси ва таълимида ота-онанинг биргаликдаги берган қарори муҳимдир. Боланинг соғлом оилавий муҳитда камол топиши давлат ва жамият олдидаги энг асосий вазифадир.