СУДЬЯ ВА ЁШЛАР УЧРАШУВИ
Чилонзор тумани ҳокимлигида Ёшлар ишлари агентлиги Чилонзор тумани бўлими етакчилари ҳамда жиноят ишлари бўйича Чилонзор тумани суди судьялари иштирокида учрашув бўлиб ўтди.
Унда жиноят ишлари бўйича Чилонзор тумани суди судьялари С. Мамадиев ва А. Абдуғаффоровлар иштирок этишди.
Тадбирда жиноят ишлари бўйича Чилонзор тумани суди судьяси С.Мамадиев сўзга чиқиб, ёшларга суд-ҳуқуқ тизимидаги ислоҳотлар, судлардаги очиқлик ва шаффофлик, туманда ёшлар иштирокида содир этилаётган жиноятлар аҳволи юзасидан маълумот берди.
Чилонзор туманида 55 та маҳалла бўлиб, аҳолининг асосий қисмини ёшлар ташкил этади. Туманда жиноятлар сони пойтахтнинг бошқа туманларига қараганда юқори. Судларда ёшлар ўртасида учраётган майда безорилик, ўғрилик, фирибгарлик, талончилик ва бошқа турдаги жиноятлар кўриб чиқилмоқда. Бу жамоатчиликни, ёшлар етакчиларини бефарқ қолдирмаслиги керак. Ўз маҳалларида жиноятчиликни олдини олишга ҳисса қўшишлари, профилактика инспекторлари билан ҳамкорликда ишлашлари зарур.
Тадбирда ҳуқуқбузарлик ва жиноят ишлари мисолида бу ишларнинг оқибатлари ҳақида маълумот берилди. Ёшлар етакчилари ўзларини қизиқтирган саволларга жавоб олдилар.