Шубҳасиз, ҳар бир инсон дунёга келар экан, унинг аъмолида ҳур ва эркин нафас олиш тақдири битилган бўлса, у бахтлидир. Аммо инсон ҳар қанча бахтли бўлмасин, унинг она халқи, азиз юрти тутқунликда бўлса, у яна забун аҳволда қолаверади. Шу маънода, остонамизда турган ватанимиз озодлиги байрамини мен бизга бахт улашган байрам, деб атагим келади. Шу йил 10 июль куни муҳтарам юртбошимиз “Ўзбекистон Республикаси давлат мустақиллигининг ўттиз тўрт йиллик байрамига тайёргарлик кўриш ва уни ўтказиш тўғрисида”ги қарорни имзолаганида ҳам шу каби хаёллар оғушида эдим. Бу муҳим ҳужжатга кўра, миллий истиқлолимизнинг 34 йиллик шонли санаси Янги Ўзбекистоннинг тараққиёт даражаси, жаҳон майдонидаги обрў-эътиборига ҳар томонлама муносиб тарзда, юксак савияда нишонланади. Мустақилликнинг 34 йиллигига бағишланган байрам тадбирлари “Ватан учун, миллат учун, халқ учун!” деган эзгу ғояни ўзида мужассам этган ҳолда ўтказилади. Мустақиллик байрами Қорақалпоғистон Республикаси, вилоятлар марказлари ва Тошкент шаҳрида, шунингдек, барча шаҳар ҳамда туманлар, қишлоқ ва овулларда муносиб нишонланиши таъминланади. “Она диёр – ранглар жилосида”, “Ватан учун яшайлик!”, “Энг улуғ, энг азиз” каби анъанавий кўрик-танловлар юқори даражада ўтказилади.
Қаранг, қанчалик муҳим тадбирлар, наинки пойтахтимиз Тошкентни, балки республикамизнинг барча ҳудудларини қамраб олган байрам шодиёналиклари қанчалик кўтаринки руҳда бўлади.
Мустақиллик фақат тарихий бир санагина бўлиб қолмай, халқимизнинг ўз йўли, ўз тақдири, ўз бахти учун қарор қабул қила олишидир. Бугун у Янги Ўзбекистоннинг тараққиёт даражаси, жаҳон майдонидаги обрў-эътиборига ҳар томонлама муносиб. Мустақилликнинг 34 йиллигига бағишланган байрам тадбирлари “Ватан учун, миллат учун, халқ учун!” деган эзгу ғояни ўзида мужассам этгани давримизга ҳамоҳанг.
Ҳар бир инсон учун қадрият тушунчаси турлича бўлиши мумкин. Кимдир учун у оила, кимдир учун илм, яна кимдир учун бойлик бўлиши мумкин. Лекин шу неъматларнинг барчаси фақат тинчлик ва эркинлик бўлган жойда қадрга эга бўлади. Бизнинг юртимиздаги эркинлик ва осойишталик муҳити умримизга мазмун, ҳаётимизга маъно беради.
Мен ҳуқуқ соҳасида фаолият кўрсатаётган мутахассис судья сифатида мустақиллик қадрини янада чуқурроқ ҳис қиламан. Айниқса, кейинги йилларда, Янги Ўзбекистон шароитида юртимизда қонун устуворлиги таъминлана бошлади.
Қонунчилик палатаси томонидан 2021 йил 15 июнда қабул қилинган ҳамда Сенат томонидан 2021 йил 26 июнда маъқулланган Ўзбекистон Республикасининг “Судлар тўрисида”ги Қонуни, Ўзбекистон Республикаси Президентининг 2023 йил 16 январдаги “Одил судловга эришиш имкониятларини янада кенгайтириш ва судлар фаолияти самарадорлигини оширишга доир қўшимча чора-тадбирлар тўғрисида”ги фармони каби муҳим ҳужжатлар биз учун дастуриламалга айланган бўлса, давлатимиз раҳбарининг “Cудьянинг онгида – адолат, тилида – ҳақиқат, дилида – поклик бўлиши керак”, деган сўзлари суд тизимини фуқароларимизнинг ҳуқуқлари, эркинликлари ва қонуний манфаатларини ишончли ҳимоя қиладиган адолат қўрғонига айлантиришга ундаган мақсад йўлида хизмат қилиш, албатта, менга ҳам катта масъулият юклагани ҳолда ўз фаолиятимга нисбатан чексиз фахр, ифтихор туйғуларини уйғотади.
Ҳар куни эрталаб ишга кетарканман, хаёлимда ана шу адолат қўрғони юксалишида ўзимнинг ҳам ҳиссам борлигидан қувонаман. Албатта, фарзандаларимизнинг мактабда мустақил мамлакат тарихи ҳақида ўқиши, тадбиркорлар эркин бизнес қилиш имконига эга бўлиши, хорижий сармоядорлар юртимизга ишонч билан кириб келиши барчаси мустақиллик самараларидир. Сўнгги йилларда Янги Ўзбекистон дунё саҳнасида ўз ўрнига эга бўлди, дунёдаги кўпгина давлатлар биз билан ҳамкорлик қилмоқда. Бу ҳам тинчлик ва барқарорлик, халқ ва давлат бирдамлигининг, қонун устуворлигининг натижасидир. Сўнгги йилларда мамлакатимизда ҳуқуқий демократик давлат ва фуқаролик жамиятини барпо этиш учун кенг имкониятлар яратилди. Суд-ҳуқуқ тизимида амалга оширилаётган чуқур ислоҳотлар бугунги кунда халқнинг судга бўлган ишончи ортишига, адолатни қарор топтиришда судларнинг ўрни янада мустаҳкамланишига хизмат қилмоқда. Бунга мен ўз фаолиятим давомида ҳам гувоҳ бўлиб келмоқдаман. Ўзим ишлаётган иқтисодий судлар олдида турган асосий вазифалардан бири тадбиркорларнинг ҳуқуқ ва манфаатларини ишончли ҳимоя қилиш, сармоявий муҳитни янада яхшилаш ва адолатли иқтисодий муносабатларни таъминлашдан иборатдир. Чунки ҳар қандай тараққиёт ва ислоҳотлар, аввало, қонун устуворлиги таъминланган жамиятдагина муваффақиятли амалга ошиши мумкин. Бугунги кунда юртимизда бизнес ва хусусий мулкни ҳимоя қилиш, эркин бозор иқтисодиётини шакллантириш, хорижий ва маҳаллий инвесторларга ишончли ҳуқуқий кафолатлар яратиш бўйича судлар зиммасига катта масъулият юкланган. Биз, суд органлари вакиллари сифатида, ушбу юксак ишонч ва масъулиятни чуқур ҳис қилган ҳолда, ўз фаолиятимизни қонун устуворлиги, холислик ва адолат мезонлари асосида амалга оширишга интиламиз. Давлатимиз раҳбари таъкидлаганидек, “Адолат бор жойда тараққиёт бўлади”. Бу тараққиёт бизни ёруғ манзилларга элтади.
Шоира ЭРМЕТОВА,
Тошкент туманлараро иқтисодий суди судьяси
