Author: admin

ТЕРГОВ СУДЬЯЛАРИ: ЯНГИ АМАЛИЁТ, МУАММО, МУҲОКАМА, ЕЧИМ

Жиноят ишлари бўйича Мирзо Улуғбек туман суди судьялари томонидан Мирзо Улуғбек туман ички ишлар бошқармаси биносида семинар-учрашув ташкил этилди.

Учрашувда жиноят ишлари бўйича Мирзо Улуғбек туман суди тергов судьялари, ҳуқуқни муҳофаза қилувчи органлар, шу жумладан маъмурий ҳуқуқбузарликлар тўғрисида ишларни кўриб чиқишга ваколатли давлат органлари иштирок этди.  

Тадбирда сўз олганлар  Ўзбекистон Республикаси Президентининг 2024 йил 10 июндаги  ПФ-89-сон “Тезкор-қидирув ҳамда тергов фаолиятида шахснинг ҳуқуқ ва эркинликларини ишончли ҳимоя қилиш кафолатларини янада кучайтириш чора-тадбирлари тўғрисида” ги Фармонига мувофиқ,  2025 йил 1 январдан жиноят ишлари бўйича туман, шаҳар судларида алоҳида судьялар — тергов судьялари фаолият кўрсатишни бошлаганлиги,  Ўзбекистон Республикасининг 2025 йил 28 январдаги Қонуни билан ишни судга қадар юритиш устидан суд назорати тергов судьялари томонидан амалга оширилиши ва тергов судьясининг ваколатлари белгиланганлиги таъкидланди.

Тадбирда тергов судьясини жорий қилишдан мақсад, тезкор-қидирув ҳамда тергов фаолиятида шахснинг ҳуқуқ ва эркиникларини самарали ҳимоя қилиш эканлиги  тергов судьясининг ваколатлари, қонунни қўллаш амалиётини такомиллаштириш, қонун бузилиши ҳолатларини олдини олиш юзасидан тушунтириш берилди.

 

Жаҳонгир Саидов,

жиноят ишлари бўйича Мирзо Улуғбек тумани суди тергов судьяси.

АСОССИЗ ҚЎЛЛАНИЛГАН ЖАРИМА БЕКОР ҚИЛИНДИ

Тошкент шаҳар суди жиноят ишлари бўйича судлов ҳайъати апелляция инстанциясида судья О.Мухаммадиев раислигида, судья катта ёрдамчиси Ш.Махмудовнинг котиблигида бўлиб ўтган суд мажлисида маъмурий жавобгарликка тортилган фуқаронинг суриштирув органи ва биринчи инстанция суди қароридан норози бўлиб тақдим қилган апелляция шикояти  асосида маъмурий ҳуқуқбузарлик тўғрисидаги иш ҳужжатлари кўриб чиқилди.

Иш ҳолатига кўра, фуқаро Б. шаҳри В. тумани Г. ва Д. кўчалари кесишмасида, ўз бошқарувидаги автомашинасида светофорнинг тақиқловчи ишорасига бўйсунмаганлиги ҳақида ҳужжатлар расмийлаштирилган.

ИИББ ЙҲХБ инспектори қарори билан фуқарога нисбатан МЖтК 128-4-моддаси 2-қисмига асосан базавий ҳисоблаш миқдорининг 2 баравари, яъни 750.000 сўм жарима солиш тўғрисидаги қарори чиқарилган, туман судининг қарори билан ушбу қарор ўзгартирилиб, МЖтК 33-моддасини қўллаб, базавий ҳисоблаш миқдорининг 1 баравари, яъни 375.000 сўм жарима жазоси тайинланган.

Апелляция инстанцияси суриштирув органи ва туман судининг қарорида баён этилган хулосалар ҳақиқий иш ҳолатига мувофиқ эмас деб ҳисоблади.

Апелляция инстанциясида ҳодиса видеолавҳаси кўздан кечирилганда, фуқаро видеонинг 0:00-0:01 вақти оралиғида светофорнинг яшил чироғида ҳаракатлангани, тўхташ чизиғини яшил чироқда кесиб ўтгани, сўнг чорраха қатнов қисмидаги бошқа ҳаракатланувчиларга хавф туғдирмаслик мақсадида ҳаракатни давом эттиргани, кейинчалик сариқ ва қизил чироқ ёнганини кўриш мумкин.

Бундай ҳолатда ҳуқуқбузарнинг ҳаракатида автомашинани светофорнинг тақиқловчи ишорасига бўйсунмасдан ҳаракатланди, деб топишга асос йўқ.

Бироқ суриштирув органи ва биринчи инстанция суди ушбу ҳолатни эътиборсиз қолдириб, қарор чиқарган.

МЖтК 271-моддаси 1-бандида “Маъмурий ҳуқуқбузарлик ҳодисаси ёки аломати йўқ бўлса, маъмурий ҳуқуқбузарлик тўғрисидаги ишларни юритишни бошлаш мумкин эмас, бошланган иш эса тугатилиши лозим” деб белгиланган.

Юқоридагилардан келиб чиқиб, апелляция инстанцияси суди иш ҳолатларини инобатга олиб, Ўзбекистон Республикаси Олий суди Пленумининг 2018 йил 30 ноябрдаги “Судлар томонидан маъмурий ҳуқуқбузарлик тўғрисидаги ишларни кўришни тартибга солувчи қонунларни қўллашнинг айрим масалалари тўғрисида”ги 35-сонли қарори талабларига риоя қилган ҳолда, фуқаронинг ҳаракатларида маъмурий ҳуқуқбузарлик аломати мавжуд эмас, деган хулосага келиб, унга нисбатан юритилган маъмурий ҳуқуқбузарликка оид ишни МЖтК 271-моддаси 1-бандига асосан тугатишни лозим топди.

Апелляция шикояти қаноатлантирилди.

З.Қўзибоев,

Тошкент шаҳар суди бош консультанти.

СУДЬЯ ВА ЁШЛАР УЧРАШУВИ

Бугун Тошкент халқаро университети (Тashkent International University)да тадбир бўлиб ўтди. Унда университет юридик факультети талаблари фуқаролик ишлари бўйича  Миробод туманлараро судининг судяси Н. Усмонова билан учрашув ташкил этилди.

Учрашув давомида судя томонидан талабаларга юртимизда Президентимиз Ш.Мирзиёев раҳбарлигида амалга оширилаётган суд-ҳуқуқ ислоҳотлари ва сўнгги янгиликлар ҳақида маълумотлар берилди.

Шунингдек, талабаларга фуқаролик судларида биринчи инстанцияда иш юритиш тартиби, юридик далиллар, иш муддатлари ва бошқа маълумотлар судья томонидан тушунарли ва содда тилда етказилди.

Тадбирда талабалар судьядан ўзларини қизиқтирган саволларга батафсил жавоб олишди.

СУД ТУГАТИШ БОШҚАРУВЧИЛАРИ БИЛАН МУЛОҚОТ

Тошкент шаҳар солиқ бошқармаси биносида тўловга қобилиятсиз деб топилган тадбиркорлик субъектларининг бюджет олдидаги умидсиз солиқ қарзини ундириш (қисқартириш) борасида суд бошқарувчилари иштирокида кенгайтирилган йиғилиш бўлиб ўтди.

Йиғилишда Тошкент шаҳар солиқ бошқармаси, Тошкент шаҳар прокуратураси вакиллари, Тошкент туманлараро иқтисодий судининг судьялари, Давлат активларини бошқариш агентлигининг Тошкент шаҳар ҳудудий бошқармаси вакиллари ҳамда суд бошқарувчилари иштирок этди.

Тадбирда суднинг ҳал қилув қарорлари билан тўловга қобилиятсиз деб топилган ва тугатиш муддатлари бир йилдан ошган ишлар бўйича муаммолар ва уларнинг ечимлари ҳақида маъруза қилинди.

Маърузада узоқ муддатдан буён тугатилмасдан келинаётган тўлов қобилиятини йўқотган корхоналарнинг сони мунтазам равишда ошиб бораётганлиги ҳолатлари солиқ органининг ва бошқа кредиторларининг ҳақли эътирозларига сабаб бўлаётганлиги қайд этиб ўтилди.

Суд бошқарувчилари томонидан ишларни ўз вақтида ва самарали ташкил этиш, тугатиш чораларини қонунда белгиланган муддатларда якунлаш, қонунбузилишларга йўл қўймаслик ҳамда суд бошқарувчиларининг тўловга қобилиятсизлик тартиб-таомилларини ўтказаётганда қарздорнинг ва кредиторларнинг манфаатларини кўзлаб оқилона иш юритиши шартлиги таъкидланди.  

Йиғилиш давомида тўловга қобилиятсиз деб топилган корхоналарнинг тугатиш ишларини олиб боришда давлат хизматларини рақамлаштириш ва Давлат активларини бошқариш агентлиги томонидан тегишли давлат ташкилотлари билан интеграция қилинганлиги ҳамда тугатиш жараёнларида юзага келаётган муаммолар ва уларнинг ечимлари бўйича таклифлар кўриб чиқилди.

Шунингдек, йиғилишда тугатилаётган корхонанинг тугатиш жараёнлари  бўйича муаммоларга қонунчилик доирасида ечим ва маслаҳатлар берилди.

 

Умид Алиев,

Тошкент туманлараро

 иқтисодий суди судьяси.

МАҲАЛЛАДА ЎТГАН САЙЁР СУДДА ТУЗАЛИШ ЙЎЛИГА ЎТГАН МАҲКУМЛАР ИШИ КЎРИБ ЧИҚИЛДИ

Жиноят ишлари бўйича Сирғали туман судининг судьяси Ойбек Кахаров томонидан “Менинг маҳаллам – менинг судьям” ғояси асосида тумандаги “Софдил” маҳалласида аҳолини суд-ҳуқуқ тизимидаги ислоҳотлар ҳамда қонунчиликдаги янгиликлар билан таништириш ва жиноятчиликни олдини олишга қаратилган ҳуқуқий тарғибот тадбири ўтказилди.

Шунингдек, маҳаллада сайёр суд мажлиси ўтказилиб, инсонпарварлик тамойилларига асосан қилган ишидан пушаймон бўлган, ўзига тегишли хулоса чиқарган, ўрнатилган тартиб-қоида талабларини бажариб, меҳнатга ҳалол муносабатда бўлган ва тузалиш йўлига ўтган бир неча шахслар тайинланган жазонинг ўталмаган муддатидан илгари шартли озод қилинди.

АШЁВИЙ ДАЛИЛЛАР ИШОНЧЛИЛИГИ ҲАМДА СУД ЭКСПЕРТИЗАСИНИНГ ЗАМОНАВИЙ ИМКОНИЯТЛАРИ

Бугунги кунда мустақил суд ҳокимияти – инсон ҳуқуқ-эркинликларини ишончли ҳимоя қилиш вазифаларини амалга оширишда илмий-техник асосланган ишончли далиллар билан исботлаш ҳамда криминалистик илмий услублардан фойдаланишни талаб этмоқда.

Хусусан, судлар томонидан кўриб чиқилаётган ишларни синчковлик билан ўрганиш, низоларни белгиланган муддатларда ва қонуний ҳал этиш, ишларни кўриш сифатини оширишда далилларни ўрганиш, уларни ҳар тарафлама текшириш ва баҳо беришда суд экспертизаси тайинлаш суд қарорларининг адолатлилигини таъминловчи муҳим омил ҳисобланади.

Суд-ҳуқуқ тизимида олиб борилаётган изчил ислоҳотлар натижасида иш бўйича далилларни тўплашда замонавий фан ва техниканинг илғор ютуқларини, хусусан криминалистик илмий услуб ва воситаларни қўллаш амалиётини янги босқичга олиб чиқиш бўйича кенг кўламли ишлар олиб борилмоқда.

Мазкур ишларни амалга оширишда 2010 йил 1 июнда қабул қилинган Ўзбекистон Республикасининг «Суд экспертизаси тўғрисида»ги Қонун, хусусан давлатимиз раҳбари томонидан 2021 йил 5 июль куни қабул қилинган “Ўзбекистон Республикасида суд-экспертлик тизимини такомиллаштириш чора-тадбирлари тўғрисида”ги Фармони экспертиза соҳасини янада ривожлантириш учун муҳим ҳужжатлар ҳисобланади.

Тошкент туманлараро иқтисодий судида ташкил этилган тадбирда “Ашёвий далиллар ишончлилигини ошириш ҳамда суд экспертизасининг замонавий имкониятлари” мавзусида сўз борди.

Тадбирда  Тошкент шаҳар суди иқтисодий ишлар бўйича судлов ҳайъати ва Тошкент туманлараро иқтисодий судининг судьялари, Ўзбекистон Республикаси Ички ишлар вазирлиги Эксперт-криминалистика бош маркази бошлиғи, полковник  С.Нуриддинов  ҳамда Ўзбекистон Республикаси Адлия вазирлиги ҳузуридаги Х.Сулаймонова номидаги суд экспертиза маркази  директори А.Халилов ва марказ вакиллари иштирок этишди.

Мазкур йиғилишни ўтказишдан мақсад  экспертиза марказларининг фаолияти, суд экспертизасини тайинлаш, экспертиза бўйича билим ва тушунчаларни бойитиш, иқтисодий судлар томонидан экспертиза ўтказиш билан боғлиқ низоларни кўрилиши, мазкур мавзуни муҳокама қилиш ва тегишли чора-тадбирлар белгилаб олиш олишдан иборатдир.

Тадбир савол-жавобларга бой, фойдали тарзда бўлиб ўтди.

 

М.Байбекова,

Тошкент туманлараро

иқтисодий суди судьяси.

СУД ФАХРИЙСИ ЭЪЗОЗДА

Кеча муборак 70 ёшни қарши олган суд фахрийси Фотима Хусановани табриклаш учун Ўзбекистон суд тизими фахрийларини ижтимоий қўллаб-қувватлаш жамоатчилик маркази Тошкент шаҳар бўлими, ҳамкасблари ҳамда фуқаролик суди вакиллари у кишининг хонадонига йўл олди.

Ф.Ҳусанова 1955 йилнинг 12 январида Тошкент шаҳрида туғилган. Суд тизимида иш фаолиятини 1976 йилдан Тошкент шаҳар Юнусобод тумани судининг котиби вазифасидан бошлаган. 1986 йилдан Юнусобод тумани судининг судьяси, Тошкент шаҳар судининг судьяси, 2001-2010 йилларда фуқаролик ишлари бўйича Тошкент шаҳар судининг судьяси, 2011-2017 йилларда Ўзбекистон Республикаси Конституциявий судининг судьяси каби лавозимларда самарали меҳнат қилди. 

Айни пайтда нафақа гаштини сурмоқда. Фарзандлари, неваралари ардоғида. Суд фахрийси билан суҳбатда хотиралар эсга олинди. Ҳозирги авлод судьяларига ҳавас билдирилди. Ф.Хусановага эзгу тилаклар айтилиб эсдалик совғалари топширилди.

СУД ҚАРОРЛАРИНИНГ ҚАЙТА КЎРИБ ЧИҚИЛИШИ МАВЗУСИДА ЎТКАЗИЛГАН ДАВРА СУҲБАТИДА СУДЬЯЛАР ИШТИРОК ЭТИШДИ 

Тошкент давлат юридик университетида Жиноят – процессуал ҳуқуқи кафедраси ҳузуридаги профессорлар илмий мактаблари доирасида “Жиноят ишлари бўйича суд қарорларининг қонунийлиги, асослилиги ва адолатлилигини текшириш тартиби” мавзусида давра суҳбати бўлиб ўтди.

Тадбирда Тошкент шаҳар судининг жиноят ишлари бўйича судлов ҳайъати судьяси О.Муҳаммадиев, адвокат, тажрибали судья Н.Акбаров ва ТДЮУ жиноят-процессуал ҳуқуқи кафедраси мустақил изланувчиси, адвокат З.Назаровлар иштирок этиб, илмий мактаб аъзоларига, мустақил изланувчиларга ва талабаларга жиноят ишларини қайта кўриб чиқишда вужудга келаётган муаммолар, бу борада эътиборга олинадиган холатлар ва фаолиятларидаги энг қизиқарли воқеалар ҳақида маълумот беришди.

Тадбир якунида талаблар ва мустақил изланувчилар ўзларини қизиқтирган саволларга мутахассислардан жавоблар олишди.

СУД ФАХРИЙСИ 70 ЁШДА

Шахабутдинова Сайёра Нурановна 1955 йил Тошкент шаҳрида туғилган. 1979 йили Тошкент давлат университетини ҳуқуқшунослик мутахасислиги бўйича битирган.

Суд тизимида 1977 йилдан Олий суд масҳатчиси, бўлим бошлиғи лавозимларида фаолият юритган. 2000 йилдан судья сифатида Тошкент шаҳар Ҳамза туман (ҳозирги Яшнобод) судининг судьяси, 2001 йили фуқаролик ишлари бўйича Миробод туманлараро суднинг судьяси, 2005-2010 йилларда Тошкент шаҳар судининг судьяси вазифаларида меҳнат қилди.

Ўзбекистон суд тизими фахрийларини ижтимоий қўллаб-қувватлаш жамоатчилик маркази раиси У.Мингбоев С.Шахабутдиновага йўллаган табрик хатида “…Сиз ҳамиша одил судловни амалга ошириш учун виждон амрига қулоқ  солган меҳнатсевар аёл судья сифатида ҳамкасбларингиз ва шогирдларингиз орасида ҳурмат қозониб келгансиз”, дея эътироф этади.

Шунингдек, Тошкент шаҳар суди раиси Э.Ходжакулов ҳам суд фахрийсини дил сўзлари билан қутлади. Бугун табрикномалар ва эсдалик совғалари ўз эгасига етказилди.

ТЕРГОВ СУДЬЯСИ ЖОРИЙ ЭТИЛИШИ МУНОСАБАТИ БИЛАН АМАЛИЙ СЕМИНАР

Ўзбекистон Республикаси Президентининг 2024 йил 10 июндаги “Тезкор-қидирув ҳамда тергов фаолиятида шахснинг ҳуқуқ ва эркинликларини ишончли ҳимоя қилиш кафолатларини янада кучайтириш чора-тадбирлари тўғрисида”ги Фармонига асосан 2025 йилнинг 1 январидан жиноят ишлари бўйича судларда тергов судьялари иш бошлайди. Бу борада тергов судьялари нималарни билишлари муҳим?

Ўзбекистон Республикаси Олий суди, Судьялар олий кенгаши ва Судьялар олий мактаби томонидан Тошкент шаҳар суди мажлислар залида  ўтказилган семинар машғулотида ана шу саволларга батафсил жавоб олинди.

Судьялар, прокуратура, ички ишлар органларининг терговчи ва суриштирувчилари, пойтахт божхона, солиқ бошқармалари маъмурий амалиёт ходимлари, адвокатлар ва бошқа дахлдор ташкилотлар вакиллари иштирок этган семинарда Олий суд, Судьялар олий кенгаши судьялари томонидан тергов судьяси институти жорий этилиши доирасида амалга оширилган ишлар ҳақида маълумот берилди.

Хусусан, Ўзбекистон Республикаси Олий суди томонидан Президент Фармони ижросини самарали ташкил қилиш бўйича илғор хорижий мамлакатлар тажрибаси ўрганилгани, тергов судьяси лавозими жорий этиладиган жиноят ишлари бўйича туман, шаҳар судларига тегишли штатлар ажратилиб, тергов судьялари тайинлангани айтиб ўтилди. Шунингдек, тергов судьяларининг вазифалари ва асосий йўналишлари ҳақида батафсил тушунтириш берилди.

 

Асосий мақсад судлар фаолияти самарадорлигини ошириш, ишни судга қадар юритишда тарафларнинг тенглиги ва тортишуви принципини амалда таъминлаш, шунингдек, тезкор-қидирув ҳамда тергов фаолиятида шахснинг ҳуқуқ ва эркинликлари самарали ҳимоя қилинишига эришишдан иборат эканлиги таъкидланди.

Фикр-мулоҳазалар ҳамда савол-жавобларга бой тарзда ўтган очиқ мулоқотда иштирокчилар тергов судьялари фаолияти билан боғлиқ саволларга батафсил жавоб олдилар.