ФАРМОН АҲАМИЯТИГА БАҒИШЛАНГАН ТАДБИР
Бугун Тошкент давлат юридик университетида Тошкент шаҳар суди фуқаролик ишлари бўйича судлов ҳайъати ва Тошкент давлат юридик университети юридик клиникаси билан ҳамкорликда Ўзбекистон Республикаси Президентининг 2025 йил 26 ноябрдаги «Ўзбекистон Республикасида юридик таълим ва илм-фанни янада ислоҳ қилиш чора-тадбирлари тўғрисида»ги Фармонининг амалий муҳокамасига бағишланган судьялар ва талабалар учрашуви бўлиб ўтди.
Тадбирда юридик кадрлар тайёрлаш сифатини ошириш, таълим, илмий тадқиқотлар ва суд амалиёти интеграциясини кенгайтириш, юридик таълимнинг янги стандарти сифатида клиник ва дуал таълимни ривожлантиришга қаратилган ислоҳотларнинг асосий йўналишлари муҳокама марказида бўлди.
Учрашувда Тошкент шаҳар суди фуқаролик ишлари бўйича судлов ҳайъати судьяси С.Сафоева сўзга чиқиб, талабаларга Президент фармонининг мазмун-моҳияти, амалий аҳамиятини тушунтириб, бундай учрашувлар юридик таълимни модернизация қилишнинг муҳим қисми эканлигини, назария ва ҳуқуқни қўллаш амалиёти ўртасида боғлиқликни шакллантириш имконини беришини таъкидлади.
Мулоқотда Тошкент шаҳар суди фуқаролик ишлари бўйича судлов ҳайъати судьялари Р. Норхўжаев, Ж. Сирожев, Ж. Шаропов, А. Султанова, А. Сайдахмедовлар томонидан фармонни стратегик мақсади мутахассисларни тайёрлашнинг амалиётга йўналтирилган моделини жорий этиш орқали Ўзбекистоннинг юридик таълимини халқаро стандартлар даражасига олиб чиқишни белгилаб бериши билан аҳамиятли экани таъкидланди.
Фармонда назарда тутилган юридик таълимга сунъий интеллектни жорий этиш мавзуси талабаларда алоҳида қизиқиш уйғотди. Талабаларга билимларни баҳолашда сунъий интеллект технологияларини қўллаш, назорат ишларини автоматлаштирилган таҳлил қилиш, сунъий интеллект тюторларини жорий этиш ва хорижий ўқитувчиларни жалб қилган ҳолда халқаро миқёсда амалга ошириладиган Digital Law йўналишини кенгайтириш истиқболлари ҳақида сўзлаб берилди.
Учрашув якунида томонлар келгусида ҳамкорликда услубий материалларни тайёрлаш, амалиёт жадвалларини келишиш ва талабаларни амалий кўникмаларини шакллантириш мақсадида реал суд жараёнларида иштирок этиш, суд ишлари билан танишиш имкониятларини келишиб олдилар.