ТОШКЕНТ ШАҲАР СУДИДА 8 МАРТ – ХАЛҚАРО ХОТИН-ҚИЗЛАР АЙЁМИ МУНОСАБАТИ БИЛАН БАЙРАМ ТАДБИРИ ТАШКИЛ ЭТИЛДИ
Унда Тошкент шаҳар суди раҳбарлари,туман ва туманлараро суд раислари,суд фахрийлари, пойтахт судларида фаолият юритаётган аёл судьялар ва суд ходимлари иштирок этишди.
Бу галги тадбир ҳар доимгидан ўзгача, юқори кайфиятда нишонланди. Байрамона кийинган аёл судьялар тадбирга кўрк бағишлади.
Тошкент шаҳар суди раиси Э.Ходжакулов судья аёлларни байрам билан самимий қутлар экан, давлатимиз раҳбари томонидан хотин-қизларга яратилаётган шароитлар, аёл қайси тизимда ишламасин унга берилаётган ғамхўрлик, пойтахт судларида фаолият юритаётган судья аёлларнинг ҳар томонлама билимли ва намунали иш фаолияти ҳақида тўхталди.
Дарҳақиқат, бугунги кунда пойтахт судларида ишлаётган аёллар сони бошқа ҳудудларга қараганда салмоқли ўрин тутади. Биргина, Тошкент шаҳар суди мисолида айтганда 56 нафар судья аёл, 83 нафар ходималар, жами 139 нафар аёллар ўз билим ва малакаларини ишга солиб, қонун устуворлиги йўлида чинакам меҳнат қилмоқдалар. Куни кеча 8 март байрамига бағишланиб Олий судда ўтказилган тадбирда Тошкент шаҳар фуқаролик ишлари бўйича Учтепа туманлараро суди судьяси Л.Ўтанбоева «Бенуқсон хизмати учун» кўкрак нишонига сазовор бўлди. Аёл судьялар орасида бундай ютуқлар мунтазам қўлга киритилмоқда.
Шунингдек, табрик учун сўзга чиққанлар судья аёл ва хотин-қизларимизга дилидаги энг эзгу сўзларини шеърий мисраларда ифодалашди. Гўзаллик ва нафосат байрами билан уларга самимий тилакларини билдиришди.
Тадбирда меҳнатга ҳалол муносабатда бўлиб келаётган 28 нафар судья аёлларга Тошкент шаҳар суди раисининг ташаккурномаси ҳамда эсдалик совғалари тантанали суратда топширилди.