Қидирув:

ФУҚАРО, ТАДБИРКОРЛИК СУБЪЕКТЛАРИ ВА ДАВЛАТ МУНОСАБАТЛАРИ ЁХУД МАЪМУРИЙ СУДЛАРНИНГ ЎРНИ

Шахс ва жамият, фуқаро ҳамда давлат ўртасидаги муносабатларда суд органлари муҳим аҳамият касб этади. Шу боис Янги Ўзбекистонда суд органлари фаолиятини замон талаблари даражасида такомиллаштириш давлат сиёсатининг устувор йўналишларидан бири сифатида белгиланди. Бу борадаги тизимли ислоҳотлар самарасида 2017 йил 1 июндан Ўзбекистон суд тизими тарихида илк бор маъмурий судлар ташкил этилди.

 

Маъмурий судлар оммавий-ҳуқуқий муносабатлардан келиб чиқадиган маъмурий низоларни, шунингдек маъмурий ҳуқуқбузарликлар тўғрисидаги ишларни кўриб чиқишга ваколатли бўлиб, маъмурий органлар билан муносабатларда қонун устуворлигини, фуқаролар ҳамда корхоналар, муассасалар, ташкилотларнинг ҳуқуқлари ва қонуний манфаатларини таъминлашга хизмат қилади. Статистик маълумотларга кўра, кейинги беш йил давомида маъмурий судлар томонидан 67 минг 989 иш кўрилган бўлса, шундан 45 мингга яқини, яъни 65 фоизи қаноатлантирилган. Шунингдек, маъмурий орган қарорларини ҳақиқий эмас деб топиш тўғрисидаги ишлар бўйича 44 фоиз иш юзасидан аризачилар фойдасига ҳал қилув қарори қабул қилинган.

 

Алоҳида таъкидлаш лозимки, бугунги ислоҳотлар тенденцияси талаб ва эҳтиёжлари, маъмурий судлар фаолиятини ҳам миллий ва илғор хорижий тажрибани инобатга олган ҳолда такомиллаштириб боришни тақозо этмоқда.

 

Шу нуқтаи назаридан Ўзбекистон Республикаси Президенти томонидан 2022 йил 29 январда имзоланган “Давлат органлари билан муносабатларда фуқаролар ва тадбиркорлик субъектлари ҳуқуқларининг самарали ҳимоя этилишини таъминлаш ҳамда аҳолининг судларга бўлган ишончини янада ошириш чора-тадбирлари тўғрисида”ги қарорининг қабул қилиниши маъмурий судлар фаолиятини янада такомиллаштиришга ҳуқуқий асос бўлади.

 

Мазкур қарорда белгиланган масалалар маъмурий ва бошқа оммавий ҳуқуқий муносабатлар соҳасида фуқаролар ва юридик шахсларнинг бузилган ёки низолашилаётган ҳуқуқлари, эркинликлари ва қонуний манфаатларини ҳимоя қилишда жамоатчиликнинг маъмурий судларга бўлган ишончини янада оширишга мустаҳкам замин яратади.

 

Қарорда маъмурий суд ишларини юритишни “суднинг фаол иштироки” тамойили асосида амалга ошириш вазифаси белгиланди. Бу фуқаролар ва тадбиркорлик субъектлари ҳуқуқларининг самарали ҳимоя этилишини таъминлашда қандай аҳамиятга эга деган савол туғилиши табиий.

Айтиш керакки, маъмурий суд судьяларининг “суднинг фаол иштироки” тамойили асосида ишлаши низоларни кўриб чиқаётган судьяга алоҳида вазифа юклайди.

 

Судьядан фуқаролар ва тадбиркорлик субъекларининг бузилган ёки низолашилаётган ҳуқуқлари, эркинликлари ва қонуний манфаатларини ҳимоя қилиш тўғрисидаги маъмурий ишларни кўриб чиқиш ҳамда ҳал этишда фақат маъмурий суд ишларини юритишни амалга ошириш тартибига, хусусан қонунийлик ва тенглик принципига қатъий риоя этиши талаб этилади.

 

Бундан ташқари, қарорда маъмурий судларнинг ҳуқуқий таъсир чорала­рини янада ошириш нуқтаи назаридан маъмурий судларнинг оммавий-ҳуқуқий муносабатлардан келиб чиқадиган ишлар бўйича ҳал қилув қарорлари давлат органлари ёки ташкилотлари томонидан ижро қилинмаган тақдирда, уларнинг мансабдор шахсларига нисбатан суд жарималарини қўллаш, оммавий-ҳуқуқий муносабатлардан келиб чиқадиган ишлар бўйича тарафлар ўртасида ярашувга эришиш механизмларини жорий қилиш масалалари назарда тутилмоқда.

 

Хулоса қилиш керакки, қарорда назарда тутилган вазифалар Янги Ўзбекистоннинг стратегик мақсади – фуқаролар ва тадбиркорлик субъектларининг бузилган ҳуқуқларини ҳимоя қилишда судларнинг, айниқса, маъмурий судларнинг ролини кучайтириш, уларни фуқаро ва тадбиркорларнинг ҳақиқий ҳимоячисига айлантиришга муҳим омил бўлади.

 

Баҳодир Қаюмов,

жиноят ишлари бўйича Мирзо Улуғбек туман суди судьяси

БЕЧОРА ҲУҚУҚИЙ МАДАНИЯТ: ҚОНУН УСТУВОРЛИГИ САРСОН, «БУЗ-БУЗ»ЛАРДА КИМ АЙБДОР?

Гап ўзбошимчалик билан ҳеч бир рухсатсиз қурилган ноқонуний қурилмалар ҳақида борар экан, бу мавзу асло қонунга мувофиқ қурилган иморатлар, қонунга кўра, давлат ва жамият манфаатлари учун олиб қўйиладиган кўчмас мулк «снос»лари ва улар учун зарарни қоплашга доир низоларга тааллуқли эмас.

 

Ушбу мавзу фақатгина ўзбошимчалик билан ҳеч бир рухсатсиз қурилган ноқонуний қурилмалар ва улар юзасидан судларда кўриб чиқилаётган низолар ҳақида.

 

Демак, аввало Ўзбекистон Республикаси Фуқаролик кодексининг 212-моддасига кўра, қонун ҳужжатларида белгиланган тартибда қурилиш мақсадлари учун ажратилмаган ер участкаларида, шунингдек, иморат қуриш учун зарур рухсатнома олмасдан ёки архитектура ва қурилиш нормалари ҳамда қоидаларини жиддий бузган ҳолда қурилган уй-жой, бошқа бино, иншоот ёки ўзга кўчмас мулк ўзбошимчалик билан қурилган иморат ҳисобланишини англаб етишимиз шарт. Ўзбошимчалик билан иморат қурган шахс унга мулк ҳуқуқини ололмайди.

Бу шахс қурган иморатини тасарруф этишга – сотишга, ҳадя этишга, ижарага беришга, иморатга нисбатан бошқа битимлар тузишга ҳақли эмас.

 

Ўзбошимчалик билан иморат қурилиши натижасида ҳуқуқлари бузилган шахснинг ёки тегишли давлат органининг даъвоси билан бундай иморат суд қарорига мувофиқ, ноқонуний қурилмани қурган шахс томонидан ёки унинг ҳисобидан бузиб ташланиши мумкин.

 

Ўзбошимчалик билан қурилган ёки ноқонуний қурилмаларни бузиш борасидаги ишлар амалиётига эътибор қаратсак, 2021 йилда Тошкент туманлараро иқтисодий судига 292 та ана шундай даъво аризалари киритилган.

 

Тошкент туманлараро иқтисодий судига киритилган шундай даъволар жорий йилнинг дастлабки 50 кунида 300 (2021 йилда эса, жами 292 та)дан ортиқни ташкил қилмоқда.

 

БУ НИМАНИ АНГЛАТАДИ?

 

 Тошкент шаҳридаги ФИБ судларига ҳам бу тоифа 1000га яқин даъволарнинг киритилганлигини эътиборга олсак, бу рақамлар ўтган йилга нисбатан бир неча баробар ошган, дейиш мумкин. Бу нимани англатади?  Ўтган бир йил давомида аҳоли томонидан шунча ноқонуний қурилма қуриб олинганлигиними?

 

Йўқ. Чунки бу каби ўзбошимчалик билан қурилган ноқонуний қурилмалар охирги бир йилда қурилмаган. Аксари, йиллар давомида қурилган.

 

Хўш, унда масала нимада, ўзбошимчалик билан қурилган ноқонуний қурилмаларнинг «болалаб» кетишига ким айбдор?

 

Бундай қурилмаларнинг юзага келаётганлигининг омили нимада?

 

Демак, бугунги мавзунинг ҳам кульминацион нуқтаси айнан мана шу савол, унинг аниқ жавоблари ва бошқа фикр-мулоҳаза ҳамда таклифлар хусусида.

 

КИМ АЙБДОР?

 

Албатта биринчи томон, яъни тегишли давлат ва назорат идоралари ва масъуллар:

 

– Қурилишга рухсат олишнинг содда ва шаффоф механизмини ўзида мужассам этган ҳуқуқий асос, яъни бу борада замон ва илғор халқаро стандартлар талабларига жавоб берадиган қонунчилик асоси ўз вақтида яратилмади.

 

– Фақат охирги 3 йил ичида бу борадаги қонунчилик базаси мустаҳкамланди, норма ижодкорлигида сезиларли ўзгаришлар қилинди.

 

– Шаҳарсозликнинг кўп йиллик концепцияси ўз вақтида ишлаб чиқилмади, натижада вақтинча, енгил типдаги конструкция ва бошқалар деган тадбиркорлик фаолиятида фойдаланиш учун ажратиладиган ер участкаларида қуриладиган ҳамда биринчи огоҳлантиришдаёқ бузиб ташланиши лозим бўлган қурилмалар – ақлсиз, коррупцияген тизим ишлаб келганлигини кўрсатади ва бу оддий ҳолатга айланди.

 

– Бундай қурилмалар бузилса, иккинчи томон – тадбиркор қанча вақт, меҳнат сарфлаши, қанча зарар кўриши ва бунинг натижаси охир-оқибат иқтисодиётимизга салбий таъсир кўрсатиши эътибордан четда қолди.

 

– Яхшиямки, бу тоифа рухсат бериш амалиётига давлатимиз раҳбарининг қарори билан чек қўйилди. Ер участкасини сотиб олиш, фойдаланиш, қурилма қуриш тизими реализациясининг ҳақиқий бозор иқтисодиётига, илғор халқаро стандартларга асосланган ҳуқуқий асоси – ер участкасига эгалик ва ундан фойдаланиш ҳуқуқини очиқ ким ошди савдоларида сотиш механизми белгиланди.

 

– Шунга қарамай соҳада қонун устуворлиги эмас, топшириқ устуворлиги ҳали-ҳамон давом этмоқда.

 

-Суд жараёнида берилаётган тарафларнинг тушунтиришларига мувофиқ, айрим ўзбошимчалик билан қурилаётган қурилмалар маҳаллий мансабдорларнинг оғзаки розилиги ва топшириғи билан қурилганлиги, улар эса ўз навбатида катта мансабдорларга ҳудудларда амалга оширилаётган ободонлаштириш ишлари лойиҳалари доирасида қилинаётган ишларни тақдимот қилишга зўр берганлиги ва натижада тегишли тартибда рухсат олинмаган қурилмаларни қурилганлик ҳолатлари ҳам аниқланмоқда.

 

Шунингдек, бу тоифа даъво аризаларнинг қисқа муддатда сезиларли равишда ортганлиги, ўзбошимчалик билан қурилган ёки ноқонуний қурилмалар бўйича тегишли равишда тизимли назорат ўрнатилмаганлиги, назорат идоралари томонидан бу борада қонунни ижросини назоратига эмас, урғу қонуности ҳужжатларига қараб қолинганлиги, юқори турувчиларнинг топшириғига қараб иш кўрилганлиги, оғзаки режалаштирилган ободонлаштириш дастурлари асосида тадбиркорларга ҳужжатсиз қурилмалар қуриш тавсия қилингани ва шу кабилар оқибатида судга шошмашошарлик билан даъво аризалар тақдим этилаётганлиги билан изоҳланади…

 

ЯНА КИМ АЙБДОР?

 

Хўш бунда яна ким айбдор? Албатта иккинчи томон, яъни таваккаллига бундай қурилмаларни қуриб олаётган аҳоли тоифаси.

Тан олиб айтиш керакки, кўпгина ҳолларда ўзбошимчалик билан иморат қуриш, ер участкаларини ноқонуний эгаллаб олиш яхшигина бош оғриққа айланган.

 

Шундан бўлса керак, халқимизда «пул топибсану ақл топмабсан» ёки «пулни топишни эмас, сарфлашни ўрган», «тадбиркор, бу – маблағ топишни билган эмас, уни сарфлашни билгандир», … каби ибратли сўзлар қўлланиб келинган.

 

Айтишингиз мумкиндир, «ўзбошимчалик билан ўша қурилмани қуришдан олдин ҳокимиятга мурожаат қилганку, ҳокимият билганку, лекин мурожаатга ўз вақтида жавоб олмагандан кейин қуради-да, нима қилсин ёки бунда коррупция ҳолатлари бор, кимдир тамаъгирлик қилиб ваъда берганки, қургандир, бўлмаса, унинг ҳам калласи (ақли) бор, ўз-ўзидан қурмас», деб…

 

Бу энди алоҳида мавзу, аммо мазкур мавзуда ўзбошимчалик билан қурилган иморат – ақлсиз сарфланган меҳнат ва ҳавога совурилаётган маблағ ҳамда унинг оқибатлари ҳақида бироз мушоҳада қилиш ўринлироқ.

 

Статистик маълумотларга кўра, ўзбошимчалик билан қурилган иморатларни бузиш ҳақида даъволарнинг аксарияти қаноатлантирилади.

Чунки бундай қурилмалар ўз номи билан ноқонуний ва ўзбошимчалик билан қурилган қурилмалардир.

 

Энди бунга сарф қилинган куч-меҳнат, вақт, асаб, ҳавога совурилган харажат ҳамда мазкур иморатларни бузиб ташлашга қилинадиган харажат – чиқимларни тасаввур қилаверинг…  Бир сўз билан айтганда, бу ҳолатни қонунни менсимаслик, унга амал қилмаслик оқибати дейиш мумкин  ёки юқори таваккалчилик (риск) – ўзбошимчалик билан қуриладиган иморатга ҳужжат расмийлаштириб олишга бўлган асоссиз ишонч ва ушбу асоссиз ишончни қонун устуворлигидан муҳим деб билиш айрим тоифа аҳоли онгига сингиб қолганлиги ҳамда ер участкасини эгаллаб олишга бўлган хоҳиш-истакнинг ўта кучлилиги ҳам бор гап.

Коррупциявий омиллар, ўзбошимчалик билан иморат қуриб олган шахснинг маълум масъул ёки мансабдорнинг порага олишига, манфаат эвазига оғдиришига бўлган ишончи аҳолининг айрим қатлами онгига сингиб қолган.

 

ҲУҚУҚИЙ МАДАНИЯТ…

 

Албатта, овораи-сарсон қонун устуворлиги, саргардон ва бечора ҳуқуқий маданият.

 

Ер участкаси ажратишнинг лозим даражадаги энг мақбул, замонавий, яхлит тизими амалда мавжуд эмас.

 

Ҳатто, ер участкасини электрон савдоларда сотиш тизимига ўтилаётганлиги ҳам кутилган самарани бермаслиги, яъни маблағи бор ва ЭСларда тажриба тўплаган шахс, ёки шахслар гуруҳинининг бундай савдоларда ғолиб бўлиш эҳтимоли юқорилиги, бунда иқтисодий ва молиявий жиҳатдан эҳтиёжманд қатлам ёки имконияти чекланган кичик тадбиркорнинг ҳуқуқлари эътиборга олинмаган.

 

Ер участкаси юртимиздаги энг қиммат товарлардан бири – олди-сотди (ноқонуний бўлса-да) объектига, шу олди-сотди жараёнлари эса, қора бозор, даромад манбаи, ноқонуний (яширин) бизнес воситасига айланиб улгурган (чала бўлса-да иморат қуриш ва мулк ҳуқуқини олиб сотиш авж олганлиги).

 

Ер участкаси борасида ваколатга эга бўлган назорат қилувчи идораларнинг назорат институти етарли самара бермаётганлиги, ўзбошимчалик билан қурилган иморатлар билан боғлиқ ишларнинг кўришда процессуал қонунчиликка мувофиқ, судларнинг даъво предмети билан чекланиши каби бир қатор омиллардир.

 

Демак, бу борада қатъий қонун нормаларини самарали назоратини таъминлаш, ер участкасини реализация қилишда топшириқларга эмас, фақат ва фақат қонун устуворлигига амал қилиш даркор.

 

Ўзбошимчалик билан қурилган иморатлар билан боғлиқ ишларни кўришда судлар ваколатини кенгайтириш, бундай низоларни ҳал этишда судлар роли ва ўрнини ошириш, «охирги сўзни суд айтади» деган тамойилга амалда ўтиш, айни низолар бўйича суд қарорлари ижросини белгиланган муддатда ва сўзсиз ижро этиш ҳамда судлар ўз ўрнида бу каби низоларни кўриш жараёни ва якуни бўйича қатъий хулоса қилишлари, айбдорларга нисбатан тегишли чораларни қўрқмай қўллашлари муҳимдир.

 

Ер участкасини реализация қилишнинг илғор, шаффоф ва адолатли ҳамда фақат ва фақат қонунлар асосида таъминланадиган тизимини яратиш ва амалда йўлга қўйиш, бу борадаги барча қонун ости ҳужжатларидан воз кечиш давр талаби саналади.

 

Давлатнинг ер участкасига бўлган ҳуқуқларини бузиш билан боғлиқ ҳуқуқбузарликларга нисбатан жамиятда муросасиз муносабатни шакллантириш долзарб муаммолигича қолиб кетмоқда.

 

Ушбу масалани ким қандай тушуниши албатта унинг илми, дунёқараши, тарбияланган муҳити, тажрибаси ва ҳоказоларга боғлиқдир, лекин гапнинг очиғини айтадиган бўлсак, ўзбошимчалик билан қурилган иморат – ақлсиз сарфланган вақт, куч-меҳнат ва ҳавога совурилаётган маблағ (инвестиция) эканлигини тан ола билсак, бу фақатгина фойдали бўлади холос.

 

Хулоса ўрнида айтсак, ноқонуний ва ўзбошимчалик билан қурилган қурилмаларни бартараф этишнинг асосий омили, бу – қонун устуворлигини сўзсиз таъминлаш, бир маъромда ривожланиб кета олмаётган ҳуқуқий маданиятни юксалтириш зарур эканлигини англаб етишимиздадир.

 

Нуриддин МУРОДОВ,

Тошкент туманлараро

иқтисодий суди раиси

ҚИДИРУВДАГИ ТЕРРОРЧИ 22 ЙИЛДАН СЎНГ ҚОНУНИЙ ЖАЗОГА ТОРТИЛДИ

Юртимизда мустақиллик туфайли диний эътиқод эркинлигига қонун асосида кенг йўл очилди.

 

Пойтахтлик Қудрат Юнусов (исм-шарифлар ўзгартирилган) ҳам бу имкониятдан фойдаланган ҳолда диний маросимларни адо эта бошлайди.

 

Аммо орадан йиллар ўтиши билан унда чин эътиқод ўрнини ақидапарастлик ғоялари эгаллайди. Аниқро­ғи, у маҳалладошлари Толируҳ Зиёхонов (лақаби «Абдумалик») ва Аъло Акбаров (лақаби «Ади») ташкил этган норасмий йиғинларга қатнашиб, «жамоат ами­ри»,­ «ҳижрат», «жиҳод» сингари ақи­­­­да­па­раст­лик ғояларини ўр­­га­нишга киришади. Ке­йин­ча­лик масжидда йиғилган шахс­ларга очиқдан-очиқ равишда ақидапарастлик ғояларини даъват қи­ла бошлайди. Бу йўл­да у мамлакатимизда фаолияти тақиқланган «Туркистон ислом ҳаракати» террорчилик ташкилоти билан олдиндан тил бириктиради. 1998 йилнинг январь ойида «ҳижрат» ниқоби остида Че­ченис­тонга йўл олади. У ер­да уюшган қу­ролли гуруҳлар таркибида жанговор тайёргарликдан ўтиб, террорчилик ҳа­ра­катини назарий ва амалий жи­­ҳатдан ўрганади. Сўнгра мамлакатимизга қайтиб келади. Орадан кўп вақт ўтмасдан террорчилик ташкилоти раҳбарларининг кўрсатмасига асосан ўанишер, Сайфулло ва Ботир исмли шахслар билан бирга қонунга хилоф равишда Тожикистонга чиқиб кетади.

 

У ерда улар террорчилик ташкилоти аъзолари учун кийим-кечак тикиш билан шуғулланишади.

 

1999 йилнинг январь ойи охирларида Қ. Юнусов тергов жараёнида аниқлашни имкони бўлмаган, террорчилик ташкилоти раҳбарларидан бири ҳи­собланган «Абдулҳаким» исм­ли шахсдан бой-бадавлат шахс­­ларнинг мол-мулкини талон-торож қилиш ҳа­қида кўр­сатма олади. Шу мақсадда қонунда белгиланган тартибни бузиб, айланма йўл­лар орқали Ўзбекистонга келади.

 

1999 йил 16 февраль куни террорчилик ташкилоти томонидан Тошкент шаҳрида кўпорувчилик ҳаракатлари амалга оширилади. Ана шу пайтда Қудрат Юнусов ўз раҳнамоларидан зарур топшириқларни ку­тиб туради.

 

Лекин ҳуқуқни му­­ҳо­фа­за қилувчи идораларининг фаол саъй-ҳаракатлари натижасида ташкилотнинг ҳаракатларига чек қўйилади.

 

1999 йил 4 март куни Қ. Юнусов ҳамтовоқлари Т. Зиёхонов, Ғ. Солиев, И. Худойберганов (лақаби «Ҳолид»), Н. Ҳакимов, М. Сафаров (лақаби «Муслим»), К. Қосимбеков (лақаби «Абдураҳмон»), А. Қуд­ратов (лақаби «Аббос») ва тергов жараёнида аниқлашнинг имкони бўлмаган «Санжар» исмли шахс билан жиноий тил бириктириб, Тошкент туманида истиқомат қилувчи Қобилжон Обидовнинг хонадонига бостириб киради. Сўнгра хонадон со­ҳиб­ларини пичоқ, арқон ва ўқ-отар қуролларга ўхшаш буюмлар билан қўрқитиб, уларнинг қўл-оёқларини боғлаб қў­йиб, 1 000 АҚШ доллари, 250 000 сўм миқдоридаги пул, 1 000 000 сўмлик тилла тақинчоқларни босқинчилик йўли билан эгаллашади.

 

Қўл­га киритилган пулни М. Сафаров орқали террорчилик ташкилотининг аъзоларига юборишади.

 

Шундан сўнг Қ. Юнусов қо­нунга хилоф равишда Тожи­кис­тонга ўтиб кетади.

 

Унга нисбатан Тошкент шаҳридаги қў­порувчилик ҳаракатлари ҳам­да босқинчилик жиноятини содир этгани учун амалдаги Жи­ноят кодексининг бир қатор моддалари билан жиноят ишлари қўзғатилиб, қидирув эъ­лон қилинади.

 

Қ. Юнусов 1999-2006 йилларда Афғонистон, Покистон, Эрон ва Тожикистонда дайдаб юради. У ушбу давлатлардаги террорчилик ва ҳарбий ҳаракатларда иштирок этади. Бу орада ҳамтавоғи Ғ. Солиевнинг бева қолган аёли Мавлуда Солиева ҳамда тожикистонлик Малика Давлатовага шаръий никоҳ асосида уйланади. Қолаверса, ик­ки-уч маротаба бошқа шахсларнинг фуқаролик паспортига ўз суратини ёпиштириб, исм-шарифини ўзгарти­ра­ди.

 

2006 йилнинг декабрь ойида у М. Давлатованинг укаси Иззатулло Давлатовнинг сохталаштирилган ҳужжати билан ноқонуний равишда «Душанбе-Бишкек-Олмаота» йўналиши бўйича Қозоғистонга борган вақтида қўшни давлатнинг хавф­­сизлик идоралари томонидан ушланган.

 

Унга бир неча жиноятларни содир этганлик айблови асосида узоқ муддатли озодликдан маҳрум қилиш жазоси тайинланган. У жазо муддатининг 14 йилу 7 ойини ўтаб озодликка чиққанидан сўнг 2021 йил 26 август куни Ўзбекис­тонга экстрадиция қилинган.

 

Яқинда жиноят ишлари бў­йича Мирзо Улуғбек тумани судида Қудрат Юнусовга нисбатан муқаддам қўзғатилган жиноят ишлари кўриб чиқилди.

 

Суд уни Жиноят кодексининг 164-моддаси 4-қисми «в» банди, 155-моддаси 3-қисми “а”, “б” банд­лари, 159-моддаси 4-қисми, 161-моддаси, 223-моддаси 2-қисми “б”, “в” бандлари, 242-моддаси 1 ва 2-қисми ҳамда 244-2-моддаси 2-қисми «а» бан­ди билан айбдор деб топиб, узоқ муддатга озодликдан маҳрум этиш жазоси тайинлади.

 

Хулоса ўрнида таъкидлаш жоизки, инсон учун Ватандан муқаддас гўша, унда эмин-эр­кин ва ҳузур-ҳаловат ила умргузаронлик қилишдан ор­тиқ бахт бўлмаса керак. Бу неъ­мат­ларнинг қадрига етмай, уларни саробга алмаштириб, нақ 22 йил ватангадо бўлиб юрган судланувчи умрининг катта қисмини темир панжара ортида ўтказадиган бўлди. Бундай аянчли қисмат бошқалар учун сабоқ бўлиши зарур. Зеро, бу дунёда ҳар ким экканини ўради.

 

Баҳромжон БЕРДИЕВ,

жиноят ишлари бўйича

Мирзо Улуғбек тумани суди судьяси

ЖИНОЯТДА ИШТИРОКЧИЛИК ТУШУНЧАСИ НИМАНИ АНГЛАТАДИ?

Амалдаги жиноят кодекси талбига кўра, жиноятда иштирокчилик деганда — икки ёки ундан ортиқ шахснинг қасддан жиноят содир этишда биргалашиб қатнашиши тушунилади.

Жиноятда иштирокчиликнинг бажарувчи, ташкилотчи, далолатчи, ёрдамчи каби турлари бор:

жиноятни бевосита содир этган шахc — бажарувчи;

 

жиноятга тайёргарлик кўрилишига ёки жиноят содир этилишига раҳбарлик қилган шахc — ташкилотчи;

 

жиноят содир этилишига қизиқтирувчи шахc — далолатчи;

 

жиноят содир этилишига кўмаклашган, шунингдек, жиноятчини жиноят содир этиш қуроли, излари ва воситаларини ёхуд жиноий йўл билан қўлга киритилган нарсаларни яширишга, шунингдек, бундай нарсаларни олиш ва ўтказиш тўғрисида олдиндан ваъда берган шахc — ёрдамчи ҳисобланади.

Жиноятда иштирокчилик оддий иштирокчилик, мураккаб иштирокчилик, уюшган гуруҳ, жиноий уюшма шаклида бўлади, 2 ёки ундан ортиқ шахснинг олдиндан тил бириктирмай жиноят содир этишда қатнашиши — оддий иштирокчилик, олдиндан тил бириктириб жиноят содир этилишида иштирок этиши — мураккаб иштирокчилик деб топилади.

Иштирокчилик нафақат тугалланган жиноятда, балки шу билан бирга жиноятга тайёргарликда ва жиноят қилишга қасд этишда ҳам намоён бўлади.

 

Фаррух Тўраходжаев,

Тошкент шаҳар судининг жиноят ишлари бўйича судьяси

ЭНДИЛИКДА 5 ЙИЛ МЕҲНАТ СТАЖИГА ЭГА ХОТИН-ҚИЗЛАР АЛОҲИДА КВОТА ОРҚАЛИ ЎҚИШГА ҚАБУЛ ҚИЛИНИШИ МУМКИН

Хотин-қизларнинг ҳуқуқ ва қонуний манфаатларини ҳимоя қилиш долзарблиги ошаётганлиги ҳамда Ўзбекистон Республикасида шахснинг ҳуқуқини белгиловчи ҳужжатларда ўзгартиришлар бўлаётганлиги суд ишларида ҳам ўз аҳамиятини кўрсатаяпти.

 

Судларда алимент тўламаслик билан боғлиқ ҳуқуқий низолар кўпаяётганлигининг олдини олишнинг ечими сифатида янги нормалар белгиланди. Эндиликда, агар шахсга суд томонидан алимент тўлаш мажбурияти юклатилган бўлса ва ундан ушбу маблағларни уч ой ичида ундириш имкони бўлмаса қуйидаги янги тартиб қўлланилади:

 

  • алимент тўловлари бўйича шаклланган қарздорлик бир йўла “Алимент тўловлари” давлат мақсадли жамғармаси маблағлари томонидан тўланади;
  •  
  • кейинчалик мазкур тўлаб берилган алимент маблағи алимент тўлаш мажбурияти юклатилган қарздордан суд қарорисиз мажбурий тартибда ундириб олинади (Ўзб. Рес. Президентининг ПФ–87-сонли Фармони).
  •  

“Алимент тўловлари” давлат мақсадли жамғармаси Мажбурий ижро бюроси ҳузурида юридик шахс ташкил этмаган ҳолда ташкил этилиши ва Мажбурий ижро бюросини ривожлантириш жамғармаси маблағлари ҳисобидан 50 миллиард сўм ажратилиши белгиланди.

 

Хотин-қизларни тазйиқ ва зўравонликдан ҳимоя қилишни кучайтириш учун 2022 йил 1 июнь санасигача тазйиқ ва зўравонликдан жабрланувчига давлат ҳимоясини тақдим этувчи ордер суд томонидан бир йил муддатгача берилишига оид қонун лойиҳаси ишлаб чиқилиши ҳам жуда аҳамиятлидир (Ўзб. Рес. Президентининг ПФ-87-сонли Фармони). Бу билан суд орқали тазйиқ ва зўравонликка учраган хотин-қизларнинг манфаатлари янада кўпроқ ҳимоя қилинади.

 

Бугунги кунда давлат ташкилотларида кадрлар билан боғлиқ масалаларда хотин-қизларнинг салмоқли ўрни бор. Аммо жуда кўплаб тажрибали ва унумдор иш меҳнати салоҳиятига эга хотин-қизлар олий маълумотга эга эмас. Давлат ташкилотларида бир неча йиллар давомида самарали меҳнат қилиб келишларига қарамасдан олий маълумот дипломи йўқлиги сабабли кўпгина хотин-қизлар суд тизимида юқори поғоналарга кўтарила олишмаяпти. Кадрлар билан боғлиқ мазкур масала 2022/2023 ўқув йилидан бошлаб ўз ечими топиши кутиляпти.

 

Хусусан, мутахассислиги бўйича камида 5 йил меҳнат стажига эга, лекин олий маълумотга эга бўлмаган 500 нафардан иборат хотин-қизларни ҳар йили Оила ва хотин-қизлар давлат қўмитаси тавсияномаларига асосан давлат олий таълим муассасаларининг бакалавриат таълим йўналишларига умумий қабул параметрларидан ташқари алоҳида тест синовлари натижаларига мувофиқ тўлов-контракт асосида ўқишга қабул қилиниши мумкин (Ўзб. Рес. Президентининг ПФ-87-сонли Фармони).

 

Мазкур квоталарнинг ажратилиши давлат ташкилотларида кадрлар билан боғлиқ ҳолатга ижобий таъсир кўрсатади.

Хотин-қизларни ўқитиш масаласи фақат шу билан чекланиб қолмаган. Президентнинг юқоридаги Фармони асосида 2022/2023 ўқув йилидан бошлаб олий таълим муассасалари, техникум ва коллежларда, шу жумладан, сиртқи ва кечки таълим шаклида ўқиётган хотин-қизларнинг таълим контрактларини тўлаш учун 7 йил муддатга фоизсиз таълим кредитларини молиялаштириш мақсадида тижорат банкларига Давлат бюджетидан ҳар йили 1,8 триллион сўм ресурс маблағлари ажратилади. Бу ҳолат яқин келажакда суд тизими фаолиятига ҳам ижобий таъсир ўтказади.

 

Хотин-қизларнинг минимал истеъмол харажатларининг қопланиши уларни жамиятдаги мавқеи ошишига олиб келади. 2022 йил 1 сентябрь санасидан бошлаб бюджет ташкилотларидан ташқари барча юридик шахсларда охирги 6 ой давомида узлуксиз иш стажига эга бўлган аёлларга ҳар ой учун минимал истеъмол харажатлари миқдоридан келиб чиққан ҳолда Давлат бюджети маблағлари ҳисобидан ҳомиладорлик ва туғиш нафақаси тўланиши белгиланаяпти. Бу ҳолат нафақат бюджет ташкилотларида балки бюджетдан ташқари ташкилотларда ҳам аёлларнинг ижтимоий қўллаб-қувватланишига сабаб бўлади. Бу эса, ўз навбатида, бюджетдан маблағ олмайдиган ташкилотлар учун ўзларининг аёл ишчилари учун қўллаб-қувватлаш вазифасига айланади.

 

Булардан ташқари, ҳозирда судларда ер участкалари давлат ёки жамоат эҳтиёжлари учун олиб қўйилиши билан боғлиқ низолар кўплиги билан ажралиб туради. Бунда низоларнинг бир қисми ер участкалари давлат ёки жамоат эҳтиёжлари учун олиб қўйилиши муносабати билан уйи (квартираси) бузилиши лозим бўлган фуқароларни турар жой билан таъминлашда содир бўларди. Чунки берилаётган уй-жойнинг ёки ер участкасига бўлган ҳуқуқнинг бозор қиймати бузилаётган уйнинг (квартиранинг) ёки ер участкасига бўлган ҳуқуқнинг бозор қийматидан ортиқ бўлганда фуқаро мазкур қиймат ўртасидаги фарқни уй-жой берилган ёки ер участкасига бўлган ҳуқуқ берилган пайтдан эътиборан беш йил ичида компенсация қилиши лозим эди. Эндиликда ушбу бозор қийматидан ортиқ бўлган фарқ мулкдор томонидан қайтарилиши талаб этилмаслиги бўйича қоида Уй-жой кодекси 27-модданинг биринчи қисмига киритилди. Шу орқали мулкдорлар ва давлат ўртасидаги ортиқча ҳуқуқий низоларга барҳам берилиши кутиляпти.

 

Яқин йилларгача фуқаролик процессида суд томонидан кўриб чиқиладиган, юридик аҳамиятга эга бўлган фактларни аниқлаш тўғрисидаги ишларда шахснинг ҳуқуқини белгиловчи ҳужжатларда фамилияси, исми ёки отасининг исми билан мос келмаган тақдирда, мазкур ҳужжатларнинг унга тегишлилиги ёхуд тегишли эмаслиги фактини аниқлашда замонавий ҳуқуқни тасдиқловчи ҳужжатлар факт сифатида киритилмас эди. 2022 йилнинг 14 март санасидан бошлаб Фуқаролик процессуал кодексининг суд томонидан кўриб чиқиладиган, юридик аҳамиятга эга бўлган фактларни аниқлаш тўғрисидаги ишларда шахснинг ҳуқуқини белгиловчи ҳужжатлар сифатида идентификацияловчи ID-карталар ҳам киритилди.

Идентификацияловчи ID-карталар 2021 йилнинг ўрталаридан бошлаб амалга киритилганлиги қарамасдан кўпгина процессуал ҳужжатларда ҳали ҳам ҳуқуқни белгиловчи ҳужжат сифатида киритилмаётган эди. Идентификацияловчи ID-карталар Ўзбекистон Республикасининг 2022 йил 14 мартдаги ЎРҚ-759-сонли Қонуни билан Фуқаролик процессуал кодексига шахснинг ҳуқуқини белгиловчи ҳужжат сифатида киритилди ва замонавийликни қамраб олди.

 

Бундан ташқари, фуқаролик судларига фарзандликка олиш тўғрисидаги ариза билан мурожаат қилинганда аризага илова қилиниши керак бўлган ҳужжатлар қаторига никоҳда турмаган шахс томонидан фарзандликка олинганда — фарзандликка олувчи паспортининг ёки идентификацияловчи ID-картасининг кўчирма нусхаси киритилди (Ўзб. Рес.нинг ЎРҚ-759-сонли Қонуни).

 

Жасур Сирожев,
фуқаролик ишлари бўйича Мирзо Улуғбек туманлараро суди судьяси

ДАЪВО АРИЗАСИ СУДЬЯ ТОМОНИДАН ҚАЙТАРИЛСА, БУНИНГ ҚАНДАЙ САБАБЛАРИ БОРЛИГИНИ БИЛАСИЗМИ?

Сўнгги пайтларда тадбиркорлардан иқтисодий судларга келиб тушаётган мурожаатларнинг аксарият қисмини судларга тақдим этилган даъво аризаларининг қайтарилаётганлиги билан боғлиқ мурожаатлар ташкил этмоқда.

 

Ушбу мурожаатларда судлар даъво аризаларини арзимас сабабларга кўра қайтараётгани, жумладан, ариза нусхаларини ишда иштирок этувчи бошқа шахсларга юборилмагани, суд харажатлари белгиланган миқдорда эмаслиги, айрим тоифадаги ишларда талабнома тартибига риоя қилинмагани ва ҳоказолар кўрсатилади.

 

Аслида ҳам шундайми? Келинг, қуйида бу борада процессуал қонунчиликда белгиланган асосларни кўриб чиқамиз.

 

Ўзбекистон Республикаси Иқтисодий процессуал кодексининг 
18-боби «Даъво тақдим этиш» деб номланиб, унда «Даъво аризасини ва аризани иш юритишга қабул қилиш», «Иш қўзғатиш тартиби», «Даъво аризасини қабул қилишни рад этиш», «Даъво аризасини қайтариш асослари», «Даъво аризаси юзасидан фикр-мулоҳаза ва қарши даъвони тақдим этиш» билан боғлиқ қоидалар жамланган.

 

Ҳар қандай манфаатдор шахс судга даъво аризаси билан мурожаат қилишга ҳақли. Демак, сиз ўз ҳуқуқ ва манфаатларингиз поймол бўлди, деб ҳисобласангиз, судга даъво аризаси билан мурожаат қилишингиз мумкин. Бироқ, тақдим этган даъво аризангизда фақатгина низоли ҳолатнинг ўзи баён этилгани етарли эмас. Сиз бир нечта процессуал тартиблар кетма-кетлигига риоя қилишингиз лозим. Корхона, ташкилотингизда ишлайдиган ҳуқуқшуносга ёки иқтисодий йўналишда тажрибага эга адвокатга мурожаат қилишингиз мумкин. 

 

Даъво аризаси судга ёзма шаклда берилади. Агар сиз раҳбар бўлсангиз, ўзингиз ёки вакилингиз томонидан имзоланади. Унда ариза бериладиган суднинг, ишда иштирок этувчи шахсларнинг номи (фамилияси, исми ва отасининг исми), жойлашган ери (почта манзили) ёки яшаш жойи, агар даъво баҳоланиши лозим бўлса, даъвонинг баҳоси, даъво талабларига асос бўлган ҳолатлар, даъво талабларининг асосларини тасдиқловчи далиллар кўрсатилиши лозим. 

 

Шунингдек, ундирилаётган ёки низолашилаётган сумманинг ҳисоб-китоби, даъвогарнинг қонунчиликка асослаб келтирган талаблари, даъво бир нечта жавобгарга нисбатан тақдим этилганда эса уларнинг ҳар бирига нисбатан талаблар, жавобгар билан низони судгача ҳал қилиш (талабнома юбориш) тартибига риоя этилганлиги тўғрисидаги маълумотлар, агар бу шу тоифадаги низолар учун қонунда ёки шартномада назарда тутилган бўлса, илова қилинаётган ҳужжатларнинг рўйхати илова қилиниши керак.

 

Даъво аризасида даъвогарнинг ёки вакилининг телефонлари, факслари рақамлари, электрон манзили кўрсатилиши мумкин. Агар низони тўғри ҳал қилиш учун зарур бўлса, бошқа маълумотлар, шунингдек даъвогардаги мавжуд илтимосномалар ҳам кўрсатилади.

 

Бу даъво аризасининг шакли ва мазмунига қўйиладиган асосий талаблар ҳисобланади.

 

Шунингдек, даъво аризасига илова қилинадиган ҳужжатларга ҳам алоҳида талаблар мавжуд. Улар белгиланган тартибда ва миқдорда давлат божи ва почта харажатлари тўланганлигини, даъво аризасининг кўчирма нусхаси ва унга илова қилинган ҳужжатлар жавобгарга ва учинчи шахсларга юборилганлигини, жавобгар билан низони судгача ҳал қилиш (талабнома юбориш) тартибига риоя этилганлигини, агар бу шу тоифадаги низолар учун қонунда ёки шартномада назарда тутилган бўлса, даъво талабларига асос бўлган ҳолатларни, даъвогарнинг юридик шахс ёки якка тартибдаги тадбиркор сифатида давлат рўйхатидан ўтганлигини, шу билар бирга даъво аризаси вакил томонидан имзоланган бўлса, уни имзолаш ваколатини тасдиқловчи ҳужжатлардир.

 

Барча талабларга жавоб берадиган даъво аризасини тайёрлаб олган бўлсангиз, энди сиз унинг кўчирма нусхасини барча иловалари билан бирга жавобгарга ва учинчи шахсларга юборишингиз шарт. Бунда сиз ушбу ҳужжатларни электрон тарзда ҳам юборишингиз мумкин.

 

Судья даъво аризасини иш юритишга қабул қилиш тўғрисидаги, қабул қилишни рад этиш ёхуд қайтариш ҳақидаги масалани даъво аризаси судга келиб тушган кундан эътиборан беш кундан кечиктирмай, якка тартибда ҳал қилади.

 

ДАЪВО АРИЗАСИНИ РАД ЭТИШ ВА ҚАЙТАРИШ ЎРТАСИДАГИ ФАРҚ

 

Шу ўринда даъво аризасини иш юритишга қабул қилишни рад этиш ва уни қайтариш ўртасида фарқни ажратиб кетамиз. Аризани иш юритишга қабул қилишни рад этиш деганда, даъво аризаси иш юритишга умуман қабул қилинмаслиги, уни қайтариш деганда эса биз юқорида санаб ўтган тартибларнинг қайсигадир риоя қилинмаганлиги тушунилиши лозим. Демак, даъво аризангиз қайтарилган бўлса, судья шу мазмунда чиқарилган ажримда кўрсатган камчиликларни бартараф этиб, такроран мурожаат қилиш имкониятингиз сақланиб қолган бўлади.

 

Алоҳида таъкидлаш лозимки, қонунчиликда судгача низони ҳал этиш мақсадида жавобгарга талабнома юбориш тартиби мавжуд. Бу тартиб агарда сиз ушбу ҳолатни шартномада махсус назарда тутган бўлсангиз ҳамда қонунда назарда тутилган алоҳида ҳолларда шарт ҳисобланади. 

 

Масалан, тарафлар ўртасида тузилган шартнома шартларини ўзгартириш ёки бекор қилиш билан боғлиқ низоларда сиз судга даъво тақдим этишдан олдин албатта жавобгарга шартнома шартларини ўзгартириш ёки бекор қилиш мазмунида таклиф йўллашингиз лозим. Агар жавобгар, яъни сизнинг ҳамкорингиз ушбу таклифга жавоб бермаса, 30 кунлик муддат ўтгандан сўнггина судга мурожаат қилишингиз мумкин.

 

Юқорида келтирилган тартиблар судга мурожаат қилишни фақат қийинлаштиради, деган фикр пайдо бўлиши мумкин. Мазкур қоидаларга риоя этилмаса, даъво аризаси судловига тегишли бўлмаган судга тақдим этилишига, суд харажатлари белгиланган миқдорда бўлмаслигига, агарда даъво аризангиз иш юритишга қабул қилинган тақдирда ҳам суд мажлиси давомида етарли бўлмаган ишга оид далилларнинг тўпланиши учун суд муҳокамаларининг кейинга қолдирилишига ёки даъво аризасининг кўрмасдан қолдирилишига олиб келиши мумкин. 

 

Даъво аризаси кўрмасдан қолдирилган баъзи ҳоллардан ташқари аксарият ҳолларда давлат божи қайтариб берилмайди.

 

Демак, судга мурожаат қилиш учун мутахассис ёрдамида барча талабларга жавоб берадиган даъво аризаси тайёрлашга ҳаракат қилиниши лозим. Шунда сизнинг даъво аризангиз қайтарилмайди ва у мазмунан кўриб чиқилади.

 

П.ЗАКИРОВА,

Тошкент туманлараро

иқтисодий суди судьяси

Skip to content