ФАРМАЦЕВТИКА ИНСТИТУТИДА ЁШЛАР БИЛАН УЧРАШУВ

ФАРМАЦЕВТИКА ИНСТИТУТИДА ЁШЛАР БИЛАН УЧРАШУВ

Тошкент давлат фармацевтика институтида фуқаролик ишлари бўйича Миробод туманлараро суди раиси Б.Сагатов, туманлараро суди судьяси А.Ҳайитова, жиноят ишлари бўйича Миробод тумани суди судьяси Т.Усмонов ва ҳамкор ташкилотлар иштирокида ёшлар билан учрашув бўлиб ўтди.

Тадбирда сўзга чиққанлар бугунги кунда суд-ҳуқуқ соҳасида амалга оширилаётган ислоҳотлар, қонунчиликдаги сўнгги янгиликлар, ёшлар ўртасида содир этилаётган жиноятлар, мавжуд муаммоларни ечими борасида сўз юритдилар.

Учрашувда фуқаролик муносабатлари, низоларнинг олдини олиш бўйича профилактик тадбирлар, фуқаролик ва жиноят судларида кўрилаётган ишлар мисоллар орқали тушунтириб берилди.

Ёшлар орасида соғлом турмуш тарзини шакллантириш, ҳар қандай ёт ғояларга қарши иммунитетни ошириш масалалари бўйича сўз борди, судьялар томонидан талабаларни қизиқтирган саволларга жавоб қайтарилди.

ЧИЛОНЗОРДАГИ САЙЁР ҚАБУЛЛАР

Тошкент шаҳар суди, Тошкент шаҳар маъмурий суди раҳбарияти ҳамда Тошкент шаҳар Халқ қабулхонаси билан ҳамкорликда ҳуқуқий жиҳатдан кўмакка муҳтож бўлган аҳоли учун Чилонзор туманининг “Дилобод” МФЙ биносида сайёр қабул ташкил этилди. Унда жами 33 нафар фуқаролар қабул қилинди.

Қабул қилинган фуқароларнинг 24 таси жиноят ишлари бўйича, 8 таси фуқаролик ишлар бўйича, 1 таси маъмурий судларга оид мурожаатларни ташкил қилди.

Сайёр қабулда 33 та мурожаатлардан 15 таси бўйича ҳуқуқий тушунтириш берилди, 18 та мурожаат жойида ижобий ҳал этилди.

Жиноят ишлари бўйича Чилонзор туман суди томонидан жазодан озод қилиш бўйича киритилган тақдимномалар асосида ахлоқ тузатиш ишлари ҳамда озодликни чеклаш жазосини ўтаётган 13 нафар шахслар жазони ўташдан муддатидан илгари шартли равишда озод қилинди.

5 нафар шахснинг маъмурий ҳуқуқбузарлик ишлари бўйича мурожаатлари қаноатлантирилди.

ТЕРГОВЧИЛАР БИЛАН ОЧИҚ МУЛОҚОТ

Тошкент архитектура-қурилиш университетида Юнусобод тумани ҳуқуқни муҳофаза қилувчи идоралар мутасаддилари иштирокида кенгайтирилган йиғилиш бўлиб ўтди.

Унда Юнусобод туман суди судьялари, прокуратура ҳамда ИИО ФМБ ҳузуридаги тергов бошқармаси терговчилари, жиноят қидирув бўлими ходимлари қатнашиб, тергов органи томонидан судга қадар иш юритиш жараёнидаги жиноят иши билан боғлиқ материалларни расмийлаштиришда ҳамда жиноят ишларини юритишда йўл қўйилаётган камчиликлар муҳокама қилинди.

 

Шунингдек, МЖтК нинг “шаҳвоний шилқимлик”, “оилавий (маиший) зўравонлик” ҳамда Маъмурий жавобгарлик тўғрисидаги кодексига 2025 йил 21 августдаги ЎРҚ-1083-сонли қонунига асосан киритилган “ҳомийлик тўғрисидаги қонунчилик талабларини бузиш” учун жавобгарлик асослари, ушбу ҳолатлар учун келиб тушган аризаларни ўрганиш, терговга қадар текширувни амалга ошириш билан боғлиқ камчиликлар, суд томонидан чиқарилган хусусий ажрим ва тақдимномаларнинг натижалари кўриб чиқилди.

БУГУН ОЛИЙ СУДДА ЁЗУВЧИЛАР ВА ЖУРНАЛИСТЛАР УЮШМАЛАРИ АЪЗОСИ, ДОЦЕНТ ТЎЛҚИН ЭШБЕК ИШТИРОКИДА МАЪРИФАТ ТАДБИРИ ЎТКАЗИЛДИ

Тадбир аввалида Олий суд Аппарати раҳбари А. Холмахматов бугун 18 ноябрь — Ўзбекистон Республикаси давлат байроғи қабул қилинган кун муносабати билан йиғилиш иштирокчиларини қутларкан, Ватанимиз тараққиёти, халқимиз жипслиги, миллий ғурурни юксалтиришда байроғимиз беқиёс ўрин тутишини таъкидлади.

Т. Эшбек тадбирни байроқ ҳақидаги шеъри билан давом эттириб, ўз сўзида муқаддас байроғимизни асраб-авайлашимиз, янада кўкларга кўтариш ҳар биримизнинг муқаддас бурчимиз эканини қайд этди.

Мамлакатимизда давлат рамзлари қонун билан муҳофаза қилинади. Давлат байроғини ҳурмат қилишда фуқароларнинг зиммасига муайян мажбуриятлар юклатилган. Ўзбекистон Республикасининг Давлат байроғи – ана шундай юксак эъзоз ва эътирофга муносиб давлат рамзи эканлиги таъкидланди.

Шунингдек, тадбирда Президентимизнинг “Янги Ўзбекистон” газетасида чоп этилган “Марказий Осиё янги давр остонасида” сарлавҳали мақоласи мазмун-моҳияти ҳақида ҳам атрофлича фикр юритилди.

СУД ВА ЁШЛАР ҲАМКОРЛИГИ

Тошкент давлат юридик университетининг Юридик клиникаси  волонтёр талабалари ҳамда Халқаро ҳуқуқ ва инсон ҳуқуқлари кафедраси профессори Д. Абдуллаева ташаббуси билан фуқаролик ишлари бўйича Мирзо Улуғбек туманлараро судида амалий тажриба ўташди.

Суд процесси давомида талабалар никоҳдан ажратиш, синов муддатлари, ҳужжатлар билан ишлаш бўйича амалий тажрибага эга бўлдилар.

Бундан ташқари талабалар суд жараёнида тарафларнинг даъволарини эшитиш, уларнинг вакиллари ҳамда тарафларнинг илтимосига кўра суд жараёнини кейинга қолдириш масалаларини ўргандилар.

ЯККАСАРОЙДАГИ ЁШЛАР БИЛАН УЧРАШУВ ВА САЙЁР СУД МУҲОКАМАЛАРИ

Яккасарой туманидаги «Муҳандислик» маҳалла фуқаролар йиғини биносида жиноят ишлари бўйича Яккасарой тумани суди судьялари ва ёшлар иштирокида учрашув ва сайёр суд муҳокамлари бўлиб ўтди.

Унда жиноят ишлари бўйича Яккасарой тумани суди судьялари Б.Қаюмов, З.Нуриддинов ва Ж.Ҳожимуродовлар иштирок этишди. Дастлаб учрашувда туманда ёшлар ўртасида содир этилаётган ҳуқуқбузарлик ва жиноятлар ҳақида маълумот берилиб, ёшларни қизиқтирган саволларга жавоблар берилди.

Шундан сўнг бир неча маъмурий ҳуқуқбузарлик билан боғлиқ ишлар юзасидан сайёр суд мажлислари бўлиб ўтди. Унда майда безорилик, жамоат жойида тартибсизлик, маст ҳолда содир этилган ҳуқуқбузарлик, алимент тўлашдан бўйин товлаш, солиқлардан қочиш, ички ишлар органлари қонуний талабига бўйсунмаслик ва бошқа ҳуқуқбузарлик ишлари кўриб чиқилди.

Ёшларга ҳар қандай ҳуқуқбузарликнинг оқибати ва жиноятга жазонинг муқаррарлиги тушунтириб ўтилди.

ОЛИЙ СУД РАИСИНИНГ БИРИНЧИ ЎРИНБОСАРИ А. УСМАНОВ БОШЧИЛИГИДА ТОШКЕНТ ШАҲАР СУДИДА ЎТКАЗИЛГАН ЙИҒИЛИШДА ЖИНОЯТ ИШЛАРИ БЎЙИЧА СУДЛАРНИНГ ЖОРИЙ ЙИЛНИНГ 9 ОЙИ МОБАЙНИДА ОДИЛ СУДЛОВНИ АМАЛГА ОШИРИШ БОРАСИДАГИ ФАОЛИЯТИ ТАҲЛИЛЛАР АСОСИДА МУҲОКАМА ҚИЛИНДИ

Маълум қилинишича, ҳисобот даврида биринчи инстанцияда 9 463 нафар шахсга нисбатан 7 659 та жиноят иши, 80 965 нафар шахсга нисбатан маъмурий ҳуқуқбузарлик тўғрисидаги 67 948 та иш, 12 663 та санкция ва материаллар кўриб тамомланган.

Юқори инстанцияларда 1 800 нафар шахсга нисбатан 1 490 та жиноят иши кўрилиб, шундан 136 нафар шахсга нисбатан чиқарилган суд қарорлари бекор қилинган.

Танқидий руҳда бўлиб ўтган йиғилишда суд қарорларининг сифати ва ижроси, суд амалиёти ва жазо тайинлашда йўл қўйилган камчиликларга тўхталиб ўтилди.

Кун тартибидан жорий йилнинг бошидан фаолиятини бошлаган тергов судьяларининг фаолияти ҳам ўрин олди.

Шунингдек, судьяларнинг эътибори ишларни кўришда белгиланган муддатларга қатъий риоя қилишга қаратилди.

ЁПИҚ СУД МАЖЛИСИ ТАФСИЛОТЛАРИНИ ОШКОР ЭТГАНЛИК УЧУН – ЖИНОИЙ ЖАВОБГАРЛИК БЕЛГИЛАНМОҚДА

Мамлакатимизда олиб борилаётган ислоҳотлар натижасида инсон ҳуқуқ ва эркинликлари, унинг шахсий ҳаёти дахлсизлиги, шахсий ҳамда оилавий сири, шаъни ва қадр-қиммати ишончли ҳимоя қилинишини таъминлашга қаратилган бир қатор қонун ҳужжатлари қабул қилинди.

Ўзбекистон Республикаси Конституциясининг 137-моддасига кўра, ҳамма судларда ишлар очиқ кўрилади. Ишларни ёпиқ суд мажлисида кўриб чиқишга фақат қонунда белгиланган ҳолларда йўл қўйилиши белгиланган.

Ўзбекистон Республикаси Фуқаролик процессуал кодексининг
12-моддасига мувофиқ, давлат сирига, фарзандликка олиш сирига тааллуқли маълумотлар мавжуд бўлган ишлар бўйича ва қонунда назарда тутилган бошқа ҳолларда ишнинг муҳокамаси ёпиқ суд мажлисида ўтказилади.

Ишда иштирок этувчи шахсларнинг шахсий ҳаёти тўғрисидаги маълумотлар ошкор бўлишининг олдини олиш, ёзишмалар сирини ва қонун билан қўриқланадиган бошқа сирни сақлаш мақсадида ёпиқ суд муҳокамаси ўтказилишига йўл қўйилади.

Иш суднинг ёпиқ мажлисида кўрилаётганида ишда иштирок этувчи шахслар, зарур ҳолларда эса гувоҳлар, экспертлар, мутахассислар ва таржимонлар ҳам ҳозир бўлади.

Ишни суднинг ёпиқ мажлисида эшитиш фуқаролик суд ишлари юритишнинг барча қоидаларига риоя қилинган ҳолда олиб борилади. Суднинг ёпиқ мажлисида видеоконференцалоқа тизимидан фойдаланишга йўл қўйилмайди.

Суднинг ҳал қилув қарори барча ҳолларда ошкора ўқиб эшиттирилади.

Қонуний кучга кирган суд ҳужжатлари тарафларнинг розилиги билан ёки шахсини кўрсатмаган тарзда суднинг расмий веб-сайтида эълон қилиниши мумкин, бундан суднинг ёпиқ мажлисида қабул қилинган суд ҳужжатлари мустаснодир.

Фуқаролик ишлари судида ёпиқ суд мажлислари қонунда назарда тутилган ҳолларда ишда иштирок этувчи шахсларнинг талабига ёки суднинг ташаббусига кўра ўтказилади.

Яъни, ёпиқ суд мажлисида иштирок этган судья, суд мажлиси котиби, прокурор, даъвогар, жавобгар, учинчи шахслар, умуман олганда барча суд мажлиси иштирокчилари ёпиқ суд мажлисида ўзларига маълум бўлган иш тафсилотлари ва бошқа маълумотларни бошқа шахсларга ошкор қилиши мумкин эмас.

Ҳозирги вақтда процессуал кодексларда ёпиқ суд мажлисларида иштирок этган шахслар маълумотларни ошкор қилганлик учун жавобгарлик ҳақида огоҳлантирилиши кўрсатилган. Бироқ, қонунчиликда бундай маълумотларни ошкор қилганлик учун жавобгарлик чоралари назарда тутилмаган. Шу муносабат билан ёпиқ суд мажлиси муҳокамаси маълумотларини ҳамда тафсилотларини ошкор қилганлик учун жиноий жавобгарликни жорий этиш зарурияти юзага келмоқда.

Шу муносабат билан Ўзбекистон Республикаси ЎРҚ-1084-сонли қонуни қабул қилиниб, Ўзбекистон Республикаси Жиноят кодекси, Жиноят-процессуал кодекси, Фуқаролик-процессуал кодекси ва Маъмурий суд ишларини юритиш тўғрисидаги кодексига ўзгартириш ва қўшимчалар киритилди.

 Мазкур қонун билан Ўзбекистон Республикасининг айрим қонун ҳужжатларига ёпиқ суд мажлиси муҳокамаси маълумотларини ҳамда тафсилотларини ошкор қилишга йўл қўйилмаслиги ҳақидаги огоҳлантирилган ёпиқ суд мажлисида иштирок этаётган шахслар томонидан уларни суднинг рухсатисиз ошкор қилганлик учун жиноий жавобгарлик белгиланишини назарда тутувчи ўзгартириш ва қўшимчалар киритилди. 

Хусусан, Ўзбекистон Республикаси Фуқаролик процессуал кодексининг 60, 62, 64, 98, 208-моддаларига ўзгартириш киритилиб, унга кўра, эксперт, мутахассис ва таржимон ёпиқ суд мажлиси муҳокамаси маълумотларини ҳамда тафсилотларини суднинг рухсатисиз ошкор қилганлик учун жиноий жавобгарлик белгиланди.

Киритилган қўшимчаларга кўра, ишни ёпиқ суд мажлисида кўриш учун асослар мавжуд бўлганда суд ишни ёпиқ суд мажлисида кўриш тўғрисида ажрим чиқаради.

Ажрим чиқарилганда ёпиқ суд мажлисида иштирок этаётган шахслар суд муҳокамаси маълумотларини суднинг рухсатисиз ошкор қилмаслик тўғрисида огоҳлантирилиб, улардан тилхат олинади.

Тилхатда мазкур мажбуриятни бузганлик учун Жиноят кодексининг 239-моддасига мувофиқ жавобгарлик ҳақидаги огоҳлантириш ҳам акс эттирилади.

Хулоса ўрнида, мазкур киритилган ўзгартириш ва қўшимчалар ёпиқ суд мажлисида кўрилган ишларни маълумотларини анонимлигини таъминлаш ва ушбу тафсилотларни ошкор этганлик учун жавобгарлик белгиланганлигини ҳамда фуқароларни ҳуқуқ ва манфаатларини қонун билан ҳимояланганлиги суднинг нуфузини оширишга хизмат қилади.

Дилноза Абдуқодирова,

Фуқаролик ишлари бўйича Учтепа туманлараро суди судьяси

СУД ВА ЁШЛАР УЧРАШУВИ

Пойтахтимиздаги Алфраганус университетида суд ва ёшлар учрашуви бўлиб ўтди. Унда жиноят ишлари бўйича Шайхонтоҳур тумани суди раиси в.в.б А. Мирзахонов, жиноят ишлари бўйича Олмазор тумани суди тергов судьяси А. Нормуҳамедов,  жиноят ишлари бўйича Учтепа тумани суди тергов судьяси Х. Содиқовлар иштирок этиб, жиноятлар профилактикаси, қонунчиликдаги янгиликлар, ёшлар ўртасида содир этилаётган жиноятлар хусусида маълумот бердилар.

Кейинги пайтда пойтахтимизда ёшлар ўртасида жиноят содир этиш холатлари кўпайган. Айниқса, фирибгарлик, кибержиноят билан боғлиқ жиноятлар сезиларли ошган. Бу эса барчани огоҳ бўлишга чақиради. Тадбирда бу каби жиноятлар амалиётдаги мисоллар орқали тушунтириб берилди. Ёшларга уяли телефон орқали содир этилаётган жиноятлардан эҳтиёт бўлиш лозимлиги уқтирилди. Талабалар судьялардан ўзларини қизиқтирган саволларга жавоб олдилар.

Жиноят ва ҳуқуқбузарликларнинг олдини олишда бу каби учрашувларнинг аҳамияти катта эканлиги эътироф этилди.

УЧТЕПАДАГИ САЙЁР ҚАБУЛЛАР

Тошкент шаҳар суди, Тошкент шаҳар маъмурий суди раҳбарияти ҳамда Тошкент шаҳар Халқ қабулхонаси билан ҳамкорликда ҳуқуқий жиҳатдан кўмакка муҳтож бўлган аҳоли учун туманнинг “Хуросон” МФЙ биносида сайёр қабул бўлиб ўтди. Унда жами 42 нафар фуқаролар қабул қилинди.

Қабул қилинган фуқароларнинг 20 таси жиноят ишлари бўйича, 10 таси фуқаролик ишлар бўйича, 9 таси маъмурий ишлар бўйича, 3 таси иқтисодий ишлар бўйича судларга оид мурожаатларни ташкил қилди.

Сайёр қабулда 41 та фуқаронинг оғзаки мурожаати эшитилди, 1 та мурожаат ёзма равишда  қабул қилинди. Шундан 26 та мурожаат бўйича ҳуқуқий тушунтириш берилган бўлса, 16 та мурожаат жойида ижобий ҳал этилди.

Жиноят ишлари бўйича Учтепа туман суди томонидан жазодан озод қилиш бўйича киритилган тақдимномалар асосида ахлоқ тузатиш ишлари жазосини ўтаётган 5 нафар шахслар жазони ўташдан муддатидан илгари шартли равишда озод қилинди.

4 нафар мурожаатчи маъмурий ҳуқуқбузарлик ҳолатларини бир ой муддатда ихтиёрий равишда бартараф этганлиги боис МЖтКнинг 271-моддаси 11 бандига асосан, 1 нафар шахсга нисбатан МЖтКнинг 21-моддасига асосан ишлар тугатилди.

 Шунингдек, 4 нафар фуқарога МЖтКнинг 33-моддаси қўлланилиб, жазолар енгиллаштириб берилди.