КОРРУПЦИЯ ХОЛАТЛАРИНИНГ ОЛДИНИ ОЛИШГА БАҒИШЛАНГАН ОЧИҚ МУЛОҚОТ
Бугун Тошкент шаҳар судида жиноят, фуқаролик, иқтисодий ишлар бўйича судлов ҳайъати раҳбарлари, судьялар, суд ходимлари ва уларнинг ота-оналари иштирокида видеоконференцалоқа тизими орқали кенгайтирилган очиқ мулоқот бўлиб ўтди.
Унда Тошкент шаҳар суди раиси Э.Ходжакулов сўзга чиқиб, пойтахт судларида коррупция холатларининг олдини олиш борасида амалга оширилаётган ишлар ҳақида маълумот берди. Инчунун, ўтган ярим йилликда Тошкент шаҳар судларида юз берган нохуш холатларга тўхталди. Бу пойтахт судлари учун доғдир. Суд ходимлари бўлажак судьялардир, уларнинг фаолияти судья бўлиши учун биринчи қадам бўлиб, айни вазифасини қандай олиб бориши билан баҳоланади. Суд ходимларининг суд остонасига қадам қўйган ҳар бир фуқарога хушмуомала бўлиши, қонунларни тўғри қўллаб, тўғри тушунтириш бериши энг муҳим вазифалардан биридир.
Тошкент шаҳар судларида фаолият юритиб келаётган барча судьялар ўзига бириктирилган судья ёрдамчиларининг ота-оналари билан танишиш ва улар билан мунтазам алоқа ўрнатиш лозимлиги қайд этилди.
Тадбирда суд фахрийлари, судьялар, суд ходимларининг ота-оналари сўзга чиқишди. Хусусан, жиноят ишлари бўйича Чилонзор туман судининг раиси И.Собиров, Тошкент шаҳар судининг иқтисодий ишлар бўйича судьяси Р.Рашидов, Тошкент шаҳар судининг фуқаролик ишлари бўйича судьяси Г.Мирзаалимова ўз тажрибалари билан ўртоқлашди, суд ходимларига бу соҳада фақат ҳалол меҳнат қилишлари лозимлигини уқтиришган бўлса, ота-оналар номидан Р.Аҳадов, С.Мамадалиева, К.Рахимов, А.Жумаевлар сўзга чиқиб, фарзандларини тарбияси, фаолиятидан доим хабардор бўлиб бораётганлиги, соҳага виждонан муносабатда бўлиши, бундан кейин ҳам назоратда ушлашларини таъкидлади.
Учрашув якунида судьялар, суд ходимлари ҳар қандай коррупция холатларига муроссасиз бўлишга келишиб олдилар.