ДОМ-ДАРАКСИЗ КЕТГАН ФУҚАРО ҚАНЧА МУДДАТДАН СЎНГ БЕДАРАК ЙЎҚОЛГАН ДЕБ ТОПИЛИШИ МУМКИН?
— Бир ой аввал кичик холам оламдан ўтди. Унинг турмуш ўртоғи ҳам, фарзандлари ҳам йўқ эди. Онам холамдан қолган уйни номига ўтказмоқчи бўлиб, нотариусга учрашса, яна бир холамнинг ҳам розилиги керак экан. У эса мана 8 йилдирки Россияга кетганча дом-дараги йўқ. Бу вазиятда уй онамнинг номига ўтиши учун қандай йўл тутишимиз керак?
Исми сир тутилди
Жалолиддин АББАСОВ, фуқаролик ишлари бўйича Шайхонтоҳур туманлараро суди судьяси:
— Фуқаролик кодексининг 33-моддасига кўра, агар фуқаронинг қаердалиги ҳақида унинг яшаш жойида бир йил давомида маълумотлар бўлмаса, манфаатдор шахсларнинг аризасига мувофиқ суд бу фуқарони бедарак йўқолган деб топиши мумкин. Йўқолган шахс тўғрисида охирги маълумотлар олинган кунни аниқлаш мумкин бўлмаса, бедарак йўқолган деб ҳисоблаш муддати йўқолган шахс тўғрисида охирги маълумотлар олинган ойдан кейинги ойнинг биринчи кунидан, бу ойни белгилаш мумкин бўлмаган тақдирда эса – кейинги йилнинг биринчи январидан бошланишлиги акс эттирилган.
Мазкур кодекснинг 36-моддаси 1-қисмида агар фуқаронинг қаерда турганлиги ҳақида унинг яшаш жойида уч йил мобайнида маълумот бўлмаса, башарти у ўлим хавф солиб турган ёки муайян бахтсиз ҳодисадан ҳалок бўлган деб тахмин қилиш учун асос бўладиган вазиятларда бедарак йўқолган бўлиб, унинг қаердалиги ҳақида олти ой мобайнида маълумотлар бўлмаса, манфаатдор шахсларнинг аризасига мувофиқ суд уни вафот этган деб эълон қилиши мумкинлиги кўрсатилган.
Ушбу қонун нормаларидан келиб чиқиб сизга, ўртанча холангизни суд томонидан бедеарак йўқолган деб топиб, онангиз мазкур мулкни ишончли бошқариб туришлиги, шундан сўнг Фуқаролик кодексининг 36-моддасига асосан судда бедарак йўқолган деб топилган холангизни яна суд томонидан ўлган деб эълон қилиб, бир ой олдин вафот этган кичик холангизга тегишли бўлган мулкка эгалик қилиши мумкинлиги тушунтирилади.