Қидирув:

ТЎЛАНМАЙ ҚОЛГАН АЛИМЕНТ ҚАРЗДОРЛИК ОШГАН НАРХДА ТЎЛАНАДИМИ?

— Икки нафар боламга республикадаги ўртача иш ҳақидан алимент тўлайман. Ўтган йили 7 ой алимент беролмадим. Энди қарзимни ошган нархда тўлайманми ёки аввалги нархидами?

Исми сир тутилди.

Алимджан Кариев, фуқаролик ишлари бўйича М. Улуғбек туманлараро суди судьяси:


— Ўзбекистон Республикаси қонунчилигига мувофиқ, ота-оналар ўз фарзандларини вояга етгунларига қадар боқиш ва тарбиялашга мажбур эканлиги, ота-онанинг вояга етмаган болаларига, шунингдек, вояга етган меҳнатга лаёқатсиз, ёрдамга муҳтож болаларига таъминот бериши шартлиги белгиланган.


Алимент тўлаши шарт бўлган ота-онанинг иш ҳақи ва (ёки) бошқа даромади доимо бир хилда бўлмай, ўзгариб турса ёхуд даромадининг бир қисмини натура тарзида оладиган бўлса, шунингдек даромаддан улуш тарзида алимент ундириш имконияти бўлмаса ёинки ота-она расман белгиланган иш ҳақи ёки даромадга эга бўлмаса, вояга етмаган болаларнинг таъминоти учун тўланиши лозим бўлган алимент миқдори ҳар ойда пул билан тўланадиган қатъий суммада белгиланиши мумкин.


Ҳар бир бола учун ундириладиган алимент миқдори қонунчилик билан белгиланган меҳнатга ҳақ тўлаш энг кам миқдорининг 26,5 фоизидан кам бўлмаслиги керак.


Алимент тўлаш ҳақидаги суд қарорларини ижросини таъминлаш қонун билан Мажбурий ижро бюроси зиммасига юклатилган.
Алимент қарзи алимент тўлаши шарт бўлган шахснинг иш ҳақи ва (ёки) бошқа даромадидан ундирилади.


Иш ҳақи ва (ёки) бошқа даромад етарли бўлмаганда, алимент тўлаши шарт бўлган шахснинг банклар ва бошқа кредит ташкилотларидаги ҳисобварақаларида турган пул маблағларидан ундирилади, мулк ҳуқуқининг ўтишига олиб келувчи шартномалар бундан мустасно. Бу маблағ етарли бўлмаганда ундириш алимент тўлаши шарт бўлган шахснинг қонун бўйича ундириш қаратилиши мумкин бўлган ҳар қандай мол-мулкига қаратилади.


Алимент тўлаш тўғрисидаги келишув ёки ижро варақаси асосида ўтган даврдаги алимент қарзи ижро варақаси ёки алимент тўлаш тўғрисидаги келишув алимент ундириш учун тақдим қилингунига қадар ўтган уч йилдан ортиқ бўлмаган муддат учун ундирилади.


Агар алимент алимент тўлаш шарт бўлган шахснинг айби билан ундирилмаган бўлса, алиментлар уч йиллик муддатдан қатъий назар, ўтган барча вақт учун ундирилади.


Қайд этилган Кодекснинг 140, 144-моддаларига асосан алимент қарзининг миқдори давлат ижрочиси томонидан суднинг ҳал қилув қарори ёки алимент тўлаш тўғрисидаги нотариал тартибда тасдиқланган келишувда белгиланган алимент миқдоридан келиб чиққан ҳолда аниқланади.


Суднинг ҳал қилув қарорига асосан пул билан тўланадиган қатъий суммада ундирилаётган алиментларни индексация қилиш алиментлар ушлаб қолинаётган жойда қонунчилик билан белгиланган меҳнатга ҳақ тўлашнинг энг кам миқдорига мутаносиб равишда амалга оширилади.


Шундан келиб чиқиб, агар сиздан фарзандларингизнинг таъминоти учун алимент республикада белгиланган меҳнатга ҳақ тўлашнинг энг кам миқдорига мутаносиб равишда ҳисобланиб ундирилаётган бўлса, қарздорлик юзага келган давр мобайнида меҳнатга ҳақ тўлашнинг энг кам миқдори ўзгарган тақдирда тўланмаган алимент бўйича қарздорлик индексация қилинган ҳолда ундирилади.

ИСБОТСИЗ АЙБЛАГАНИ УЧУН ҚЎШНИМНИ СУДГА БЕРИШИМ МУМКИНМИ?

— Эрим Россияда ишларди, қайтганига 15 кун бўлди. Тепа қаватда турадиган қўшнимиз билан аввалдан келишмасдик. Шу аёл эримга «хотинингни қадам босиши тўғримас», деб ҳар хил гаплар қилибди, ҳатто енгилтакликда ҳам айблабди. «Далил, исботи бўлса, кўрсатсин», десам, қўшни аёл «ҳеч нимани кўрсатмайман», деяпти. Эрим мендан шубҳаланиб қолди. Мени енгилтакликда айблагани учун қўшнимни судга беришим мумкинми?

Исми сир тутилди.

Жаҳонгир Одилов, жиноят ишлари бўйича Учтепа туман суди судьяси:


— Сиз биринчи навбатда қўшнингизнинг хатти-ҳаракати юзасидан тегишли тартибда яшаш жойингиздаги ички ишлар идорасига ариза билан мурожаат қилишингиз лозим. Шундан сўнг, ички ишлар идораси томонидан аризангиздаги ҳолат бўйича тўлиқ, ҳар томонлама ва синчковлик билан суриштирув ҳаракатлари ўтказилади. Қўшнингиз томонидан ҳақиқатдан ҳам сиз ҳақингизда била туриб ёлғон, шарманда қилувчи, ҳақиқатга мос келмайдиган уйдирмаларни тарқатганлиги аниқланса, Маъмурий жавобгарлик тўғрисидаги кодекснинг 40-моддаси билан яъни, тухмат билан боғлиқ ғайриҳуқуқий ҳаракат содир этилганлиги юзасидан маъмурий ҳуқуқбузарлик тўғрисидаги баённома расмийлаштирилиши, шундан сўнг, ички ишлар идораси томонидан маъмурий ҳуқуқбузарлик тўғрисидаги иш кўриб чиқиш учун тегишли судларга юборилиши мумкин.


Суд ҳам ўз навбатида ушбу тўпланган иш ҳужжатларини ўрганиб чиқиб, қўшнингизни айби тасдиқланса, Маъмурий жавобгарлик тўғрисидаги кодекснинг 40-моддасига асосан базавий ҳисоблаш миқдорининг йигирма бараваридан қирқ бараваригача миқдорда жарима жазоси тайинлаши мумкин.

ТАЪТИЛДАН ҚАЙТГАНЛАРГА МОДДИЙ ЁРДАМ БЕРИЛМАЙДИМИ?

— Бюджет ташкилотида ишлайман. Бола парваришлаш таътилидан қайтганимга 6 ой бўлди. Соғлигимдаги муаммолар сабабли даволаниш учун моддий ёрдам олмоқчи эдим. Аммо бухгалтер яқинда таътилдан қайтганимни айтиб, рад этди. Шу тўғрими?

Исми сир тутилди

Анвар Ҳамидов, фуқаролик ишлари бўйича Миробод туманлараро суди раис ўринбосари:


— Моддий ёрдам деганда биз иш берувчининг ўз ходимларига маълум бир ходиса юз берганида тўлайдиган пул маблағларини тушунишимиз лозим. Иш берувчи ходимларга моддий ёрдам кўрсатиш тартиби ва ҳолатларни мустақил белгилайди. Моддий ёрдам олиш учун асослар иш берувчининг локал ҳужжатларида, яъни жамоа шартномаси ёки жамоа келишувида белгиланади.


Унда қандай ҳужжатлар тақдим этилиши, моддий ёрдам пули миқдори, тўлов шартлари ва бошқа шартлар белгиланади. Агар моддий ёрдам кўрсатиш шартлари белгиланмаган бўлса, бундай ҳолатда ташкилот раҳбари ходимнинг илтимосига биноан тўловларни мустақил равишда ҳал қилиши мумкин.

 

Таъкидлаш жоизки, Солиқ кодексининг 377-моддасида белгиланишича, моддий ёрдам қуйидаги ҳолларда берилиши мумкин:


• вафот этган ходимнинг оила аъзоларига ёки оила аъзоси вафот этганлиги муносабати билан ходимга кўрсатиладиган;


• ходимга меҳнатда майиб бўлганлиги, касб касаллиги ёхуд соғлиғига бошқача тарзда шикаст етганлиги билан боғлиқ ҳолда кўрсатиладиган;


• бола туғилиши, ходим ёки унинг фарзандлари никоҳдан ўтиши муносабати билан кўрсатиладиган;


• қишлоқ хўжалиги маҳсулотларини бериш ёки уларни сотиб олиш учун маблағлар бериш тарзида кўрсатиладиган моддий ёрдам;


• Моддий ёрдам олиш учун ходим раҳбар номига асослантирилган ариза билан мурожаат қилиши керак ва иш берувчи бу масалани кўриб чиқиб, ижобий натижа бўлса, буйруқ чиқаради. Хулоса қилишимиз мумкин, моддий ёрдамни бериш ёки бермаслик фақат бундай ваколатга эга бўлган раҳбар ҳал қилади.

ХОРИЖГА КЕТИБ ҚОЛГАН ОТАДАН АЛИМЕНТ ҚАНДАЙ УНДИРИЛАДИ?

— Икки нафар фарзандим билан турмушимдан ажрашдим. Суд алимент ундируви ҳақида қарор чиқармасидан болаларимнинг отаси хорижга кетиб қолди. Энди алимент миқдори қандай белгиланади? Қачондан бошлаб ҳисобланади? Болаларимнинг отаси хорижда-ку. Ундан алимент қандай ундирилади? Шунча вақтдан бери тўламай кечиктиргани учун жавобгарликка тортиладими?

Исми сир тутилди

Зулфия Нуралиева, фуқаролик ишлари бўйича Мирзо Улуғбек туманлараро судининг судьяси:

 

— Оила кодексининг 2-моддасига асосан, оилавий муносабатларни тартибга солиш эркак ва аёлнинг ихтиёрий равишда никоҳланиб тузган иттифоқи, эр ва хотиннинг шахсий ҳамда мулкий ҳуқуқлари тенглиги, ички оилавий масалаларнинг ўзаро келишув йўли билан ҳал қилиниши, оилада болалар тарбияси, уларнинг фаровон ҳаёт кечириши ва камолоти ҳақида ғамхўрлик қилиш, вояга етмаган ва меҳнатга лаёқатсиз оила аъзоларининг ҳуқуқ ва манфаатларини ҳимоя қилиш устуворлиги тамойиллари асосида амалга оширилади.

 

Ўзбекистон Республикасида оила, оналик, оталик ва болалик давлат ҳимоясидадир.

 

Она ва бола манфаатларини муҳофаза қилиш аёлларнинг меҳнати ва соғлиғини сақлашга доир махсус тадбирлар кўриш, меҳнатни оналик билан боғлаб қўшиб олиб бориш учун аёлларга шароит яратиш, оналик ва болаликни ҳуқуқий ҳимоя қилиш, моддий ва маънавий жиҳатдан қўллаб-қувватлаш йўли билан таъминланади.

 

Ота-она ўз болаларига нисбатан тенг ҳуқуқ ва мажбуриятларга эгадирлар.

 

Оила кодексининг 96-моддасида қуйидаги назаррда тутилган ота-она вояга етмаган болаларига таъминот бериши шарт.

 

Вояга етмаган болаларига таъминот бериш мажбуриятини ихтиёрий равишда бажармаган ота (она)дан суднинг ҳал қилув қарорига ёки суд буйруғига асосан алимент ундирилади.

 

Вояга етмаган болаларга алимент тўлаш ҳақида ота-она ўртасида келишув бўлмаганда ёки алимент ихтиёрий равишда тўланмаганда ва ота-онадан бирортаси ҳам алимент ундириш тўғрисида судга даъво ёхуд ариза билан мурожаат қилмаган ҳолларда, васийлик ва ҳомийлик органлари, шунингдек ўн тўрт ёшга тўлган бола вояга етмаган боланинг таъминоти учун ота ёки онадан қонунда белгиланган миқдорда алимент ундириш тўғрисида даъво қўзғатишга ҳақлидир.

 

Ота-она ва бола алоҳида-алоҳида яшаган тақдирда, васийлик ва ҳомийлик органлари, шунингдек ўн тўрт ёшга тўлган бола бир вақтнинг ўзида ота ва онадан вояга етмаган болаларнинг таъминоти учун алимент ундириш тўғрисида даъво қўзғатишга ҳақли.

 

Вояга етмаган болаларига алимент тўлаш ва уларга таъминот беришда ота-онанинг мажбуриятлари тенгдир.

 

Вояга етган, меҳнатга лаёқатсиз, ёрдамга муҳтож болаларига таъминот беришда ота-онанинг мажбуриятлари тенгдир.

 

Шунингдек, ота-она вояга етмаган болаларига таъминот бериш учун алимент тўлаш тартибини ўзаро келишган ҳолда белгилашга ҳақлидирлар.

 

Вояга етмаган болаларига таъминот бериш учун алимент тўлаш тартиби ва шакли ҳақида ота-она ўртасидаги келишув қонунда белгиланган қоидаларга ва боланинг манфаатларига зид бўлмаслиги керак.

 

Ота-онанинг вояга етмаган болаларига тўлайдиган алимент миқдори Оила кодексининг 99-моддаси билан тартибга солинган, унга кўра агар вояга етмаган болаларига таъминот бериш ҳақида ота-она ўртасида келишув бўлмаса, уларнинг таъминоти учун алимент суд томонидан ота-онанинг ҳар ойдаги иш ҳақи ва (ёки) бошқа даромадининг бир бола учун — тўртдан бир қисми; икки бола учун — учдан бир қисми; уч ва ундан ортиқ бола учун — ярмиси миқдорида ундирилади. Бу тўловларнинг миқдори тарафларнинг моддий ёки оилавий аҳволини ва бошқа эътиборга лойиқ ҳолатларни ҳисобга олган ҳолда суд томонидан камайтирилиши ёки кўпайтирилиши мумкин.

 

Ҳар бир бола учун ундириладиган алимент миқдори қонун ҳужжатлари билан белгиланган меҳнатга ҳақ тўлаш энг кам миқдорининг 26,5 фоизидан кам бўлмаслиги керак.

 

Ота-онадан болаларга ундириладиган алимент миқдори алимент тўловчининг ойлик иш ҳақига ва (ёки) бошқа даромадига нисбатан улушлар ҳисобида ёки пул билан тўланадиган қатъий суммада белгиланиши мумкин.

 

Алимент тўлаши шарт бўлган ота-онанинг иш ҳақи ва (ёки) бошқа даромади доимо бир хилда бўлмай, ўзгариб турса ёхуд даромадининг бир қисмини натура тарзида оладиган бўлса, шунингдек даромаддан улуш тарзида алимент ундириш имконияти бўлмаса ёинки ота-она расман белгиланган иш ҳақи ёки даромадга эга бўлмаса, вояга етмаган болаларнинг таъминоти учун тўланиши лозим бўлган алимент миқдори ҳар ойда пул билан тўланадиган қатъий суммада белгиланиши мумкин.

 

Алимент Ўзбекистон Республикаси ҳудудида ва унинг ташқарисида пул ёки натура тарзида олинган барча турдаги даромадлардан ушлаб қолинади.

 

Чет эл валютасида олинадиган даромадлар алимент ундириладиган кунда амалда бўлган Ўзбекистон Республикаси Марказий банкининг расмий курси бўйича сўмларда ҳисобланади.

 

Оила кодексининг 136-моддасига кўра алимент олиш ҳуқуқига эга бўлган шахс, алимент талаб қилиш ҳуқуқи вужудга келганидан сўнг қанча муддат ўтганидан қатъи назар, хоҳлаган вақтда алимент ундириш тўғрисидаги талаб билан судга мурожаат қилишга ҳақлидир.

 

Мазкур шахс, низо бўлмаган тақдирда, вояга етмаган болалар учун алимент ундириш тўғрисидаги ариза билан судга мурожаат этишга ҳақли бўлиб, бу ариза буйруқ тартибида иш юритиш тарзида кўриб чиқилади.

 

Алимент судга мурожаат этилган пайтдан бошлаб ундирилади.

 

Агар таъминот учун маблағ олиш чоралари судга мурожаат қилингунга қадар кўрилганлиги, аммо алимент тўлаши шарт бўлган шахснинг уни тўлашдан бош тортганлиги оқибатида алимент олинмаганлиги суд томонидан аниқланса, ўтган давр учун алимент судга мурожаат этилган пайтдан бошлаб уч йиллик муддат доирасида ундириб олиниши мумкин.

 

Алимент ундириш тўғрисидаги суднинг ҳал қилув қарори ёки суд буйруғи қонун ҳужжатларида белгиланган тартибда ижро этилади.

 

Суднинг алимент ундириш ҳақидаги ҳал қилув қарори ёки суд буйруғи дарҳол ижро этилиши лозим.

 

Алимент тўлаш тўғрисидаги келишувга мувофиқ алимент тўлаши шарт бўлган шахснинг айби билан қарз вужудга келган бўлса, айбдор шахс ушбу келишувда белгиланган тартибда жавобгар бўлади.

 

Суднинг ҳал қилув қарорига кўра алимент тўлаши шарт бўлган шахснинг айби билан қарз вужудга келган бўлса, айбдор шахс кечиктирилган ҳар бир кун учун тўланмай қолган алимент суммасининг ўндан бир фоизи миқдорида алимент олувчига неустойка тўлайди.

 

Алимент олувчи алимент ўз вақтида тўланмаганлигида айбдор алимент тўлаши шарт бўлган шахсдан алимент тўлаш мажбуриятларини ўз вақтида бажармаганлик оқибатида етказилган барча зарарларнинг неустойка билан қопланмаган қисмини ундиришга ҳам ҳақлидир.

 

Шунингдек, вояга етмаган ёки вояга етган меҳнатга лаёқатсиз, ёрдамга муҳтож болаларига алимент тўлаш ҳақидаги суднинг ҳал қилув қарорини бажаришдан бўйин товлаган шахслар ушбу Кодекснинг 79-моддасига асосан яъни ота-оналик мажбуриятларини бажаришдан бош тортса, шу жумладан алимент тўлашдан бўйин товласа, ота-оналик ҳуқуқидан маҳрум қилиниши ёки жиноий жавобгарликка тортилиши мумкин.

 

МЖтКнинг 47-4-моодасига кўра, моддий ёрдамга муҳтож бўлган вояга етмаган ёки меҳнатга лаёқатсиз шахсни моддий таъминлашдан бўйин товлаш, яъни уларни моддий жихатдан таъминлаш учун суднинг ҳал қилув қарорига ёки суд буйруғига биноан ундирилиши лозим бўлган маблағни жами бўлиб икки ойдан ортиқ муддат мобайнида тўламаслик, 15 сутка муддатга маъмурий қамоққа олишга ёки маъмурий қамоқ қўлланилиши мумкин бўлмаган шахсларга базавий ҳисоблаш миқдорининг йигирма баравари миқдорида жарима солишга сабаб бўлади.

 

Биринчи марта ҳуқуқбузарлик содир этган шахс, агар у маъмурий ҳуқуқбузарлик тўғрисидаги ишни кўриш жараёнида алимент мажбуриятлари бўйича қарздорликни ихтиёрий равишда тўлаган бўлса, жавобгарликдан озод этилади.

 

Шунингдек, Жиноят кодексининг 122-модда талабига мувофиқ моддий ёрдамга мухтож бўлган вояга етмаган ёки меҳнатга лаёқатсиз шахсни моддий таъминлашдан бўйин товлаш, яъни уларни моддий жихатдан таъминлаш учун суднинг ҳал қилув қарорига ёки суд буйруғига биноан ундирилиши лозим бўлган маблағни жами бўлиб икки ойдан ортиқ муддат мобайнида тўламаслик, шундай қилмиш учун маъмурий жазо қўлланилганидан кейин содир этилган бўлса, икки йилгача ахлоқ тузатиш ишлари ёки бир йилгача озодликдан маҳрум қилиш билан жазоланади.

 

Ўша қилмиш хавфли рецидивист томонидан содир этилган бўлса, икки йилдан уч йилгача ахлоқ тузатиш ишлари ёки уч йилгача озодликдан маҳрум қилиш билан жазоланади.

 

Агар шахс алимент мажбуриятлари бўйича қарздорликни тўлиқ тўлаган бўлса. У жавобгарликдан озод қилинади.

АЛИМЕНТ МИҚДОРИНИ КАМАЙТИРИШ УЧУН ҚАЕРГА МУРОЖААТ ЭТИШ КЕРАК?

— Эрим биринчи турмушидан расман ажрашмай, менга шаръий никоҳ асосида уйланган. Биринчи турмушидаги фарзандлари учун ҳам алимент, ҳам моддий ёрдам тўлайди. Яқинда мен ҳам фарзандли бўлдим, шу сабаб ишламаяпман. Қайнота-қайнонам ҳам ишламайди, эрим оиламизнинг ёлғиз таъминотчиси. Олган маоши рўзғоримизга етмаяпти. Шу сабаб алимент миқдорини камайтиришса бўладими? Бунинг учун қаерга, ким мурожаат этиши керак?

Исми сир тутилди

Алимджан Кариев, фуқаролик ишлари бўйича Мирзо Улугбек туманлараро суди судьяси:


— Амалдаги қонунчилик талабларига мувофиқ, вояга етмаган болалар таъминоти учун алимент ундириш икки усулда – алимент ундириш тўғрисидаги келишув ҳамда суд ҳужжати асосида амалга оширилади.


Оила кодексини 96-моддасига асосан, вояга етмаган болаларига таъминот бериш мажбуриятини ихтиёрий равишда бажармаган ота (она)дан суднинг ҳал қилув қарорига ёки суд буйруғига асосан алимент ундирилади.


Алимент тўлаётган ота-онанинг бошқа вояга етмаган болалари бўлиб, ундан қонунда белгиланган миқдорда алимент ундирилганда ўша болалар алимент олаётган болаларга нисбатан моддий жиҳатдан камроқ таъминланиб қоладиган бўлса, шунингдек алимент тўлаётган ота(она) ногирон бўлиб, моддий жиҳатдан қийналиб қолаётган бўлса алимент миқдори суд томонидан камайтирилиши мумкинлиги Оила кодексининг 96-моддасида белгиланган.


Бунинг учун алимент тўлаётган ота ёки она, шунингдек, қонун талабларига мувофиқ расмийлаштирилган ишончнома асосида уларнинг ишончли вакиллари ҳам даъво аризаси билан жавобгар (иккинчи тараф)нинг яшаш жойи ҳудудидаги фуқаролик ишлари бўйича судига мурожаат қилишлари мумкин.
Судга мурожаат қилиш учун киритиладиган даъво аризани Фуқаролик процессуал кодексининг 189-моддаси талабларига мувофиқ расмийлаштириш лозим бўлади.


Даъво аризага шахсни тасдиқловчи ҳужжат нусхаси, бола(лар)нинг туғилганлик гувоҳномаси нусхаси, алимент ундириш ҳақида қабул қилинган суд ҳужжатлари нусхаси, тўланаётган алимент миқдорини камайтиришга асос қилиб кўрсатилган ҳолатларни тасдиқловчи далиллар, давлат божи ва почта харажати тўланганлигини тасдиқловчи ҳужжатлар, шунингдек, даъвогар томонидан ўз талабини тасдиқловчи бошқа далиллар ҳам илова қилинади.


Ўзбекистон Республикасининг 2020 йил 6 январдаги «Давлат божи тўғрисида»ги қонуни талабига мувофиқ, давлат божи ҳар бир даъво талаб бўйича алоҳида-алоҳида тўланиши назарда тутилган бўлиб, даъвогар мулкий тусдаги талаби учун даъво баҳосининг 4 фоизи, лекин Республикада белгиланган базавий ҳисоблаш миқдорининг бир баравари кам бўлмаган миқдорида, номулкий тусдаги талаблар бўйича Республикада белгиланган базавий ҳисоблаш миқдорининг икки баравари миқдорида давлат божи тўлаши лозим.


Тўланаётган алимент миқдорини камайтириш ҳақидаги даъво номулкий тусдаги талаб бўлиб, мазкур даъво билан судга мурожаат қилишда Республикада белгиланган базавий ҳисоблаш миқдорининг икки баравари миқдорида давлат божини тўлаш лозим бўлади.
Юқорида қайд этилган қонун талабларига кўра, алимент миқдорини камайтириш талаби билан судга фақат алимент тўловчи шахслар ёки ишончнома уларнинг ишончли вакиллари мурожаат қилишга ҳақли.


Даъво ариза манфаатдор шахс номидан иш юритишга ваколати бўлмаган шахс томонидан берилган тақдирда Фуқаролик процессуал кодексининг 122-модда биринчи қисм 2-банди талабларига кўра у кўрмасдан қолдирилади.
Никоҳдан ажратиш тўғрисидаги ишлар суд томонидан Фуқаролик процессуал кодексида даъво ишларини ҳал қилиш учун белгиланган тартибда кўриб чиқилади.


Бунинг учун эр-хотин ёки уларнинг номидан конун талабларига мувофиқ расмийлаштирилган ишончнома асосида ишончли вакил судга даъво ариза билан мурожаат қилиши лозим бўлади.
Суд ишнинг кўрилишини кейинга қолдириб, эр-хотинга ярашиш учун олти ойгача муҳлат тайинлашга ҳақли. Эр-хотинни яраштириш мақсадида олти ойлик муҳлат ичида ишнинг кўрилиши бир неча марта кейинга қолдирилиши мумкин.


Оила кодекси 1-моддасининг иккинчи қисми талабига мувофиқ никоҳдан ажратиш тўғрисидаги ишни кўришда суд оилани сақлаб қолиш юзасидан чоралар кўриши лозим. Шу мақсадда, суд мажлисида оилани сақлаб қолиш мумкинлигини тасдиқловчи ҳолатлар (болалар борлиги, никоҳнинг давомийлиги, оиладаги муносабатларнинг хусусиятлари, вақтинчалик келишмовчилик ва бошқалар) аниқланганда, суд ҳар иккала тарафнинг ёки улардан бирининг илтимосига биноан ёхуд ўз ташаббуси билан никоҳдан ажратиш тўғрисидаги иш кўрилишини кейинга қолдиришга ҳақли.

“ҚИЗИМГА МЕРОСДАН УЛУШ АЖРАТИЛИШИГА АММАСИ ҚАРШИЛИК ҚИЛИШИ ТЎҒРИМИ?”

— Турмуш ўртоғим вафот этди. Қизимга ҳам отасидан қолган меросдан улуш ажратилганди. Бу нотариус орқали тасдиқланганди, лекин қайнопам бунга қаршилик қиляпти. У қизимни меросдан маҳрум қилиш мақсадида судга ариза билан мурожаат қилибди. Унинг шу ҳаракати тўғрими? Меросдан улушимизни олиш учун қандай йўл тутсак тўғри бўлади?

Исми сир тутилди

Жасур Сирожев, фуқаролик ишлари бўйича Шайхонтоҳур туманлараро суди раис ўринбосари:

 

— Фуқаролик кодексининг 1134-моддасига асосан, қонун бўйича меросхўрлар ворисликка ушбу Кодекснинг 1135-1141-моддаларида назарда тутилган навбат тартибида чақириладилар. Қонун бўйича ворисликда фарзандликка олинган шахс ва унинг авлодлари, бир тарафдан, фарзандликка олувчи шахс ва унинг қариндошлари, иккинчи тарафдан, туғишган қариндошларга тенглаштириладилар. Фарзандликка олинганлар ва уларнинг авлодлари фарзандликка олинган шахснинг ота-онаси ҳамда бува-бувилари, ака-укалари, опа-сингиллари вафот этганидан кейин қонун бўйича мерос олмайдилар. Фарзандликка олинган шахснинг ота-онаси ҳамда бува-бувилари, ака-укалари, опа-сингиллари фарзандликка олинган шахс ва унинг авлодлари вафот этганидан кейин қонун бўйича мерос олмайдилар. Қонун бўйича ворисларнинг ҳар бир навбати аввалги навбатдаги меросхўрлар бўлмаган, меросдан четлаштирилган, меросни қабул қилмаган ёхуд ундан воз кечган тақдирда ворислик ҳуқуқига эга бўлади.

 

Фуқаролик кодексининг 1135-моддасига кўра, Мерос қолдирувчининг болалари (шу жумладан фарзандликка олинган болалари), эри (хотини) ва ота-онаси (фарзандликка олувчилар) тенг улушларда қонун бўйича биринчи навбатдаги ворислик ҳуқуқига эга бўладилар. Мерос қолдирувчининг вафотидан кейин туғилган болалари ҳам биринчи навбатдаги ворислар жумласига кирадилар.

 

Фуқаролик кодексининг 1146-моддасига асосан, мерос очилган жойдаги нотариус меросхўрнинг илтимосига кўра унга меросга бўлган ҳуқуқи тўғрисида гувоҳнома бериши шарт. Меросга бўлган ҳуқуқ тўғрисидаги гувоҳнома мерос очилган кундан эътиборан олти ой ўтганидан кейин берилади.

 

Қонун бўйича мерос олинганида ҳам, васиятнома бўйича мерос олинганида ҳам, агар нотариус тегишли мол-мулкка ёхуд бутун меросга нисбатан гувоҳнома беришни сўраб мурожаат этган шахслардан бошқа меросхўрлар йўқлиги тўғрисида маълумотларга эга бўлса, гувоҳнома юқорида кўрсатилган муддат тугамасидан олдин берилиши мумкин.

 

Шунингдек, Фуқаролик кодексининг 1150-моддасига асосан, меросни қабул қилиб олган қонун бўйича меросхўрлардан исталган бири мероснинг тақсимланишини талаб қилишга ҳақли. Меросни тақсимлаш меросхўрларнинг келишувига кўра ўзларига тегишли улушларга мувофиқ, келишувга эришилмаган тақдирда эса, суд тартибида амалга оширилади.

 

Демак, турмуш ўртоғингиз вафотидан кейин қолган мерос мулки, никоҳ даврида орттирилган бўлса, тегишли тартибда эр ва хотиннинг умумий мулки ҳисобланиб, унга нисбатан сизнинг ҳам улуш олиш ҳуқуқингиз мавжуд бўлади.

 

Агарда ушбу мулк турмуш ўртоғингизга ворислик ҳуқуқидан келиб чиқадиган бўлса, барча меросхўрлар жалб этилган ҳолда, дастлаб низо бўлмаган тақдирда нотариус томонидан мерос гувоҳномаси тақдим этилиши мумкин.

 

Мерос мулкини қабул қилишда сизнинг ҳуқуқларингиз бузилган тақдирда тегишли тартибда, кўчмас мулк жойлашган ҳудуддаги тегишли туманлараро судига даъво ариза билан мурожаат этиш ҳуқуқингиз мавжуд.

 

Бунда судга сурожаат этишда Фуқаролик процессуал кодексининг 189 ва 191-моддалари талабларига риоя этган ҳолда, даъво аризасини тақдим этилиши лозим.

АЛИМЕНТНИ БОБОНИНГ ПЕНСИЯСИГА ҚАРАТИШ ТАРТИБИ ҚАНДАЙ?

Турмуш ўртоғим мактабда боғбон бўлиб ишлайди. Маоши камлиги сабаб бир амаллаб рўзғорга етказяпмиз. Бунинг устига биринчи турмушидан туғилган ўғли учун алимент тўлайди. Турмуш ўртоғим алиментни отасининг пенсиясига қаратиб, чет элга ишлаш учун кетса бўладими?

Исми сир тутилди

Ғайрат Эргашев, фуқаролик ишлари бўйича Яккасарой туманлараро суди раиси:

 

— Оила кодексининг 96-моддасига кўра, ота-она вояга етмаган болаларига таъминот бериши шарт.

 

Вояга етмаган болаларига таъминот бериш мажбуриятини ихтиёрий равишда бажармаган ота (она)дан суднинг ҳал қилув қарорига ёки суд буйруғига асосан алимент ундирилади.

 

Ушбу Кодексининг 114-моддасига кўра, алимент ундириш тўғрисидаги суднинг ҳал қилув қарори ёки суд буйруғи қонун ҳужжатларида белгиланган тартибда ижро этилади.

 

 “Суд ҳужжатлари ва бошқа органлар ҳужжатларини ижро этиш тўғрисида”ги Қонунинг 46-моддасига кўра, қуйидагилар мажбурий ижро этиш чоралари ҳисобланади:

 

1. ундирувни қарздорнинг пул маблағларига ва бошқа мол-мулкига қаратиш;

 

2. ундирувни қарздорнинг бошқа шахсларда турган пул маблағларига ва бошқа мол-мулкига қаратиш;

 

2-1. ундирувни қарздорнинг дебиторлик қарзига, шу жумладан қарздор ундирувчи сифатида иштирок этаётган ижро ҳужжати бўйича унга тегишли бўлган маблағларга қаратиш;

 

2-2. ундирувни қарздорга тегишли бўлган алоҳида мулкий ҳуқуқларга қаратиш;

 

3. ундирувни қарздорнинг иш ҳақи, стипендияси, пенсияси ва бошқа турдаги даромадларига қаратиш;

 

4. ижро ҳужжатида кўрсатилган муайян ашёларни қарздордан олиб қўйиш ва ундирувчига топшириш;

 

5. ижро ҳужжатининг ижро этилишини таъминловчи қонунларга мувофиқ кўриладиган бошқа чоралар.

Юқорида қайд қилинган қонун талабига кўра, алиментни бобо-бувисининг пенсиясига қаратиш назарда тутилмаган.

 

Оила кодексининг 122-моддасига кўра, ушбу Кодекснинг 123-128-моддаларида кўрсатилган шартлар мавжуд бўлса, вояга етмаган, шунингдек вояга етган меҳнатга лаёқатсиз, ёрдамга муҳтож шахсларга таъминот бериш мажбурияти суд томонидан уларнинг қариндошлари: бобо, буви, невара, ака-ука, опа-сингил, шунингдек ўгай ота ва ўгай она, ўгай ўғил ва ўгай қиз, доимий тарбияда бўлган шахслар зиммасига юклатилиши мумкин.

 

Ушбу Кодекснинг 123-моддасига кўра, ота-онаси йўқ бўлган ёки улардан таъминот ололмайдиган вояга етмаган невараларига таъминот бериш мажбурияти етарли маблағга эга бўлган бобо ва буви зиммасига юклатилиши мумкин. Вояга етган меҳнатга лаёқатсиз, ёрдамга муҳтож невараларнинг ота-онаси, эри ёки хотини (собиқ эри ёки хотини) ва вояга етган меҳнатга лаёқатли болалари бўлмаса ёхуд улардан таъминот учун маблағ ололмаса, уларга нисбатан ҳам бу мажбурият бобо ва бувининг зиммасига юклатилиши мумкин.

 

Олий суди Пленумининг 2016 йил 29 июль кунидаги “Судлар томонидан вояга етмаган ва вояга етган меҳнатга лаёқатсиз болалар таъминоти учун алимент ундиришга оид ишлар бўйича қонунчиликни қўллаш амалиёти тўғрисида”ги 11-сонли Қарорининг 20-бандига кўра, вояга етмаган ва вояга етган меҳнатга лаёқатсиз шахсларга таъминот бериш мажбуриятлари белгиланган Оила кодексининг 122-моддасига мувофиқ, ота-онаси йўқ бўлган ёки улардан таъминот ололмайдиган вояга етмаган ва вояга етган меҳнатга лаёқатсиз, ёрдамга муҳтож шахсларга таъминот бериш суд томонидан уларнинг қариндошлари: бобо, буви, невара, ака-ука, опа-сингил, шунингдек, ўгай ота ва ўгай она, ўгай ўғил ва ўгай қиз ҳамда доимий тарбияда бўлган шахслар зиммасига юклатилиши мумкин.

 

Бунда, судлар алимент миқдорини, қарздорнинг ҳамда ундирувчи (даъвогар)нинг моддий ва оилавий аҳволини ҳисобга олган ҳолда, ҳар ойда пул билан тўланадиган қатъий суммада белгилашлари лозим.

 

Юқорида қайд қилинган қонун талабларидан келиб чиққан ҳолда, суд Ўзбекистон Республикаси Оила Кодексининг 123-моддасида кўрсатилган шартлар мавжуд бўлса, вояга етмаганларга таъминот бериш мажбурияти суд томонидан уларнинг қариндошлари: бобо ёки буви зиммасига юклатиши мумкин бўлади. Бу масалада албатта фуқаролик ишлари бўйича судларга мурожаат қилиш лозим бўлади. Бунда суд томонидан қарздорнинг ҳамда ундирувчи (даъвогар)нинг моддий ва оилавий аҳволини ҳисобга олинган ҳолда, ҳар ойда пул билан тўланадиган қатъий суммада белгиланади.

 

“Суд ҳужжатлари ва бошқа органлар ҳужжатларини ижро этиш тўғрисида”ги Қонунинг 42-1-моддасига кўра, суд ҳужжати асосида берилган ижро ҳужжатидаги ёки ижро ҳужжати бўлган суд ҳужжатидаги талаблар белгиланган муддатда қарздор жисмоний шахс томонидан узрсиз сабабларга кўра ижро этилмаганда, давлат ижрочиси ундирувчининг аризаси бўйича ёки ўз ташаббуси билан қарздор жисмоний шахснинг Ўзбекистон Республикасидан чиқишини вақтинча чеклаш тўғрисида қарор чиқаришга ҳақли.

 

Вояга етмаган болалар таъминоти учун алиментлар олдиндан тўланган ёки алимент тўлаш мажбуриятини таъминлаш учун гаров шартномаси тузилган бўлса, давлат ижрочиси тўлов ёки гаров шартномаси тўғрисидаги тегишли ҳужжат олинган куннинг эртасидан кечиктирмасдан манфаатдор шахсларни, ички ишлар органларини ва Давлат чегарасини қўриқлаш органларини қарздор жисмоний шахснинг Ўзбекистон Республикасидан чиқишини чеклаш олиб ташланганлиги тўғрисида ёзма ёки электрон шаклда хабардор қилади. Бунда гаров қиймати қонунчиликда белгиланган базавий ҳисоблаш миқдорининг икки юз эллик бараваридан кам бўлмаслиги лозим.

 

Алиментларни олдиндан тўлаш, шунингдек чиқиб кетишга чеклашни олиб ташлаш учун алимент тўлаш мажбуриятини таъминлаш бўйича гаров шартномасини тузиш тартиби Вазирлар Маҳкамаси томонидан белгиланади.

 

Вазирлар Маҳкамасининг 2018 йил 6 октябрдаги 808-сонли “Алиментларни олдиндан тўлаш, шунингдек, алимент тўлаш мажбуриятини таъминлаш бўйича гаров шартномасини тузиш тартиби тўғрисидаги низомни тасдиқлаш ҳақида” Қарорига илова “Алиментларни олдиндан тўлаш, шунингдек алимент тўлаш мажбуриятини таъминлаш бўйича гаров шартномасини тузиш тартиби тўғрисида”ги Низом талабига кўра, ижро ҳужжатлари бўйича алиментларни олдиндан тўлаш ёки алимент тўлаш мажбуриятини таъминлашда гаров тақдим этиш учун қарорларни ижро этиш усули ва тартибини ўзгартириш фуқаролик процессуал қонунчилигида белгиланган тартиб ва муддатларда амалга оширилади.

ҚЎШНИМНИНГ «КЎЧИБ КЕТМАСАНГИЗ УСТИНГИЗДАН АРЗ ҚИЛАМИЗ» ДЕГАН ТАЛАБИ ТЎҒРИМИ?

— Ўғилларим шўх. Уйда копток тепишади, қувлашмачоқ ўйнашади. Пастки қаватда яшайдиган қўшнимиз «Тинчимизни бузяпсизлар, кўчиб кетинглар бўлмаса, устингиздан арз қиламиз», деб бир неча марта пўписа қилди. Бола бўлишса, ўз уйида оёқ учида юришмайди-ку, қўшнимизнинг шу талаби тўғрими? Бизнинг қандай ҳақ-ҳуқуқларимиз бор?

Исми сир тутилди.

Ўктам Қаҳаров, жиноят ишлари бўйича Чилонзор туман суди судьяси:


— Ўзбек миллати ўзининг узоқ йиллик тарихи давомида менталитети ва диний қадриятларидан келиб чиқиб қўни-қўшничилик муносабатларига алоҳида эътибор қаратган. Бу қадрятимиз ҳозирги замонда ҳам давом этиб келаётган бўлсада, баъзи ҳолларда кўп қаватли уйларда яшовчи аҳоли ўртасида маиший шовқин билан боғлиқ келишмовчиликлар бўлиб турганлиги қулоғимизга чалинииб туради.


Ҳозирги давр жиноят ва маъмурий жавобгарлик тўғрисидаги қонунчилигимизда қўшниларнинг бирор сабаб билан зиддиятларга боришига алоҳида қилмиш сифатида квалификация қилинмайди, бироқ келиб чиққан оқибатларга қараб бир нечта хатти-ҳаракатлар учун маъмурий ва жиноий жавобгарлик назарда тутилган.


Мамлакатимизнинг Бош қомусида ҳар ким эркинлик ва шахсий дахлсизлик ҳуқуқига, ҳар ким ўз шаъни ва обрўсига қилинган тажовузлардан, шахсий ҳаётига аралашишдан ҳимояланиш ва турар жойи дахлсизлиги ҳуқуқига ҳамда Ўзбекистон Республика фуқаролари Ўзбекистон ҳудудида бир жойдан иккинчи жойга кўчиш, Ўзбекистон Республикасига келиш ва ундан чиқиб кетиш ҳуқуқига эга эканлиги белгиланган.


Сиз саволда сўраган қўшнингизни сизга нисбатан кўчиб кетишни талаб қилиши амалдаги қонунчилигимизга мутлақо зид эканлиги, қўни-қўшнилар билан тинчлик тотувликда яшаш чораларини кўриш нафақат сиз, балки жамиятимизнинг ҳар бир аъзосининг фуқаролик бурчи эканлиги тушунтирилади.

ОТАНИНГ ХОРИЖГА ЧИҚИШИГА РОЗИЛИК БЕРИЛСА, АЛИМЕНТ ҚАРЗДОРЛИГИ ЁПИЛАДИМИ?

— 2011 йили бир нафар фарзандим билан турмушимдан ажрашгандим. Суд фарзандим учун алимент ундиришга қарор чиқарганди. Бошида алимент тўлади, лекин сўнгги тўрт йилда умуман тўламай қўйди. Натижада собиқ турмуш ўртоғим алиментдан 20 миллион сўм қарз бўлди. Чет элга чиқишига тақиқ қўйилган эди. Унинг «хорижга кетиб, ишлаб, қарзимни узаман», деган гапига ишониб, розилик хатига қўл қўйиб бергандим. У чет элга ишлаш учун кетди, лекин қарзини тўламади. Ижрочиларга қарзини ундириб беришини сўраб мурожаат қилсам, «собиқ турмуш ўртоғингизни Ўзбекистондан чиқишига рухсат берадиган ҳужжатга қўл қўйиб берганингиз учун унинг ҳамма қарзи ёпилиб кетган», дейишди. Шундай бўлиши мумкинми? Энди алимент қарзини ундириш учун нима қилишим керак? Ҳозир боламнинг отаси хорижда. Ундан алиментни қай тартибда ундираман?

Исми сир тутилди

Жасур СИРОЖЕВ, фуқаролик ишлари бўйича Шайхонтоҳур туманлараро суди раис ўринбосари:


— Алимент ундириш қарздорнинг иш ҳақига ёки бошқа унга тенглаштирилган тўловларга қаратилади. Шунингдек, қарздорга давлат ижрочиси муайян ҳаракатларни бажаришга чеклов ўрнатиши, жумладан, чет элга чиқишини ҳам тақиқлаши мумкин.


Қарздор фаолияти бевосита четга чиқиш билан боғлиқ бўлган вақтда, давлат ижрочиси қонунда белгиланган тартибда қарздорни четга чиқишига рухсат беради. Алимент олиш ҳуқуқига эга бўлган шахс, алимент талаб қилиш ҳуқуқи вужудга келганидан сўнг, қанча муддат ўтганидан қатъи назар, хоҳлаган вақтда алимент ундириш тўғрисидаги талаб билан судга мурожаат қилишга ҳақлидир.


Бир сўз билан айтганда, алиментлар ундириш тўғрисидаги ижро ҳужжатлари давлат ижрочисига келиб тушган вақтдан бошлаб, қарздорнинг барча турдаги мол-мулки хатланади ва унинг чет элга чиқишига ҳам тақиқ қўйилади.


Алимент тўлаши шарт бўлган шахс доимий яшаш учун ёки уч ойдан ортиқ муддатга чет давлатга кетаётганида қонунга мувофиқ ўзи таъминот бериши лозим бўлган алимент олувчи билан белгиланган тартибда келишув тузиши шарт.


Алиментларни олдиндан тўлаш ёки алимент тўлаш мажбуриятини таъминлаш учун гаров шартномасининг тузилиши давлат ижрочиси ёки суд томонидан қарздор жисмоний шахснинг илгари белгиланган Ўзбекистон Республикасидан чиқишини вақтинча чеклашни олиб ташлаш учун асос ҳисобланади.


Алиментлар олдиндан тўланган ёки алимент тўлаш мажбуриятини таъминлаш учун гаров шартномаси тузилган бўлса, давлат ижрочиси тўлов ёки гаров шартномаси тўғрисидаги тегишли ҳужжат олинган куннинг эртасидан кечиктирмасдан манфаатдор шахсларни, ички ишлар органларини ва Давлат чегарасини қўриқлаш органларини қарздор жисмоний шахснинг Ўзбекистон Республикасидан чиқишини чеклаш олиб ташланганлиги тўғрисида ёзма ёки электрон шаклда хабардор қилади. Бунда гаров қиймати қонунчиликда белгиланган базавий ҳисоблаш миқдорининг икки юз эллик бараваридан кам бўлмаслиги лозим.


Агарда сиз билан собиқ турмуш ўртоғингиз ўртасида келишув тузилган бўлиб, унга кўра, фақатгина қарздорни чет элга чиқиши учун розилик берган бўлсангиз, юзага келган қарздорликни ундириш хусусида давлат ижрочисига мурожаат этишга ҳақлисиз.


Бироқ қарздорни чет элга чиқиши учун алимент қарздорлиги йўқлигини тасдиқлаб ёзма ариза билан мурожаат этган бўлсангиз, кўрсатилган муддатгача бўлган қарздорлигини ундириш мумкин бўлмайди.
Шуни таъкидлаб ўтамизки, қарздор чет элга ишлаш учун чиқиб кетаётган вақтда Вазирлар Маҳкамасининг «Алиментларни олдиндан тўлаш, шунингдек, алимент тўлаш мажбуриятини таъминлаш бўйича гаров шартномасини тузиш тартиби тўғрисида»ги Низом талаблари асосида иш юритганингизда мақсадга мувофиқ бўлади.


Қарздор чет элда бўлган вақтда ҳам алимент ундируви тегишли давлат ижрочиси томонидан қонунда белгиланган тартибда амалга оширилади. Ундирувни қарздорнинг Ўзбекистон Республикасидан ташқарида турган мол-мулкига, шу жумладан, унинг чет эл банкларидаги пул маблағларига қаратиш Ўзбекистон Республикасининг қонунчилиги ҳамда халқаро шартномаларига мувофиқ амалга оширилади.


Агар маблағ етарли бўлмаганда ундириш алимент тўлаши шарт бўлган шахснинг қонун бўйича ундириш қаратилиши мумкин бўлган ҳар қандай мол-мулкига қаратилади.

УСТОЗЛАР ЮКСАК ЭЪЗОЗ ВА ЭЪТИБОРДА

Ҳар қандай шахснинг камол топиши учун устозларнинг ўрни беқиёсдир. Устозлар маънавият осмонида мусаффо зиё таратиб турувчи йўлчи юлдуз кабидир. Улар туфайли шогирдлар ҳамиша муваффақиятга эришадилар.

 

Юртимизда кенг нишонланадиган “9 май – Хотира ва қадрлаш куни” арафасида жиноят ишлари бўйича Мирзо Улуғбек туман судининг раиси Шуҳрат Бакаев ва туман суди судьялари Баҳром Бердиев, Муҳаммад Қаюмов Ўзбекистон Судьялари Ассоциациясига ташриф буюришди. Мақсад, Ассоциация раиси Убайдулла Мингбоевни байрам билан табриклаш, фахрли устозлари билан суд тизимининг тарихи, бугуни ва келажаги, соҳанинг дарғалари тўғрисида ҳамсуҳбат бўлиш.

Таъкидлаш жоиз, Ўзбекистонда хизмат кўрсатган юрист, Ўзбекистон Судьялари Ассоциацияси раиси Убайдулла Мингбоев наинки суд тизимида, балки кенг жамоатчилик ўртасида катта обрў-эътиборга эга. Меҳнат фаолиятини терговчиликдан бошлаган Убайдулла Мингбоев Сурхондарё вилоят суди судьяси, раис ўринбосари, Бухоро вилоят суди раиси, Тошкент шаҳар суди раиси, Мустақил Ўзбекистон Республикаси Олий судининг биринчи раиси сифатида самарали меҳнати билан эътибор қозонган.

 

Ассоциация раиси судья шогирдларига хотира ва қадрлаш куни хусусида тўхталиб, “ҳозиргидек доруломон кунларда яшашимиз учун жасорат кўрсатиб, ҳаётини қурбон қилган аждодларимизнинг ёди ҳеч қачон унутилмайди”, деди. Суҳбат асносида “сизлар ҳам суд соҳасига янгидан кириб келаётган ёшларнинг устозларга муносиб издош бўлиб, орттирган тажрибаларингизни ўргатинг”, дея ўгит ва маслаҳатлар берди.

Устоз ва шогирдларнинг байрамона кайфиятда ўтган суҳбатидан устоз эъзоз ва эҳтиромга муносиб шарафли зот эканлиги намоён бўлди. Зеро, немис ёзувчиси ва мутафаккир Иоганн Гёте таъкидлаганидек, “Чинакам шогирд бор нарсалар негизида мавҳум нарсалар ривожини ўрганади ва шу йўл билан устозига яқинлашиб боради”.

Skip to content